UniCredit-მა რეკორდული მოგება მიიღო

წამყვანმა იტალიურმა ფინანსურმა ინსტიტუტმა, UniCredit-მა კვარტალური შედეგები გამოაქვეყნა. ბანკის წმინდა მოგებამ მიმდინარე წლის პირველ 3 თვეში რეკორდულ 3.2 მილიარდ ევროს ($3.7 მლრდ.) მიაღწია. აღსანიშნავია, რომ ეს მონაცემი ანალიტიკოსების მიერ პროგნოზირებულ 2.7 მილიარდ ევროს მნიშვნელოვნად აღემატება.

როგორც ირკვევა, ბანკის შემოსავლები ფინანსური ინვესტიციებიდან მიღებული დივიდენდების გასამმაგებამ და სესხების მოცულობის ზრდამ განაპირობა. აღსანიშნავია, რომ კომპანიამ წლიური მოგების პროგნოზი 11 მილიარდ ევრომდე გაზარდა. თუ გასული წლის ანალოგიურ პერიოდში წმინდა მოგება 16%-ით ნაკლები იყო, ამჯერად მაჩვენებელმა მოლოდინს გადააჭარბა.

პარალელურად, იტალიურმა ფინანსურმა გიგანტმა Commerzbank-ის აქციების შესაძენად 35 მილიარდი ევროს ($41 მლრდ.) ღირებულების შეთავაზება წარადგინა. ამ ნაბიჯით UniCredit-ი მიზნად გერმანულ ბანკში საკუთარი წილის 30%-მდე გაზრდას ისახავს. მიუხედავად იმისა, რომ გერმანიის მთავრობა და Commerzbank-ის ხელმძღვანელობა პროცესს ეწინააღმდეგებიან, ოფიციალური ტენდერი სამშაბათს მაინც დაიწყო. როგორც ირკვევა, აღმასრულებელი დირექტორი ანდრეა ორჩელი მიიჩნევს, რომ ეს გარიგება აქციონერებისთვის მოგებიანი იქნება.

ცნობისთვის, UniCredit-ი ბოლო პერიოდში აქტიურად ყიდულობს სხვადასხვა ფინანსური ინსტიტუტის აქციებს. მათ შორისაა საბერძნეთის Alpha Bank-ი და იტალიური სადაზღვევო კომპანია Generali.