"ვაპირებთ, მოვაწყოთ როგორც სამაცივრე მეურნეობა, ისე A კლასისა და ფარმაცევტული ტიპის საწყობები" - "მეტა ჰაბის" გეგმები
ქართულ ლოგისტიკურ ბაზარზე ახალი კომპანია - მრავალფუნქციური სასაწყობო და კომერციული სივრცე "მეტა ჰაბი" (MetaHub) გამოჩნდა. კომპანია ბიზნესს განსხვავებულ ინფრასტრუქტურულ შესაძლებლობებს და 200-დან 15 000 კვადრატულ მეტრამდე ფართებს სთავაზობს, რომლებიც საწარმოო, კომერციული და ლოგისტიკური მიზნებისთვისაა განკუთვნილი. "მეტა ჰაბი" ლილოში, კახეთის გზატკეცილიდან 2 წუთის სავალზე მდებარეობს.
"საქმიანი დილას" ეთერში კომპანიის დამფუძნებლებმა, გიორგი ლომთათიძემ და დავით ზაუტაშვილმა ახალი ბიზნესის დაფუძნების, ინფრასტრუქტურული მოდელისა და საფასო პოლიტიკის შესახებ ისაუბრეს.
როგორც მათ აღნიშნეს, პროექტის შექმნის იდეა გიორგი ლომთათიძის მრავალწლიან გამოცდილებას უკავშირდება, რომელიც სასაწყობო სექტორში 2012-2013 წლებიდან საქმიანობს.
"დღესდღეობით, ჩვენ 3.5 ჰექტარ ტერიტორიას მოვიცავთ, სადაც 18 000 კვადრატულ მეტრამდე ფართობის საწყობებია განთავსებული. ამ წლების განმავლობაში საკმაოდ დიდი გამოცდილება შევიძინე როგორც მოიჯარეებთან ურთიერთობით, ისე კვალიფიციური გუნდისა და სამშენებლო ჯგუფის ჩამოყალიბებით... სწორედ აქედან გამიჩნდა იდეა, მომეძებნა კიდევ უფრო განსხვავებული, სტრატეგიული და საკვანძო ადგილი, სადაც კიდევ უფრო თანამედროვე ტიპის საწყობებს ავაშენებდით", - ამბობს ლომთათიძე.
ახალი მასშტაბური პროექტის განსახორციელებლად გიორგი ლომთათიძე "გრადა ჯგუფის" დამფუძნებელ დავით ზაუტაშვილს დაუკავშირდა. პარტნიორობის შედეგად მათ 17 ჰექტარი მიწის ნაკვეთი შეიძინეს, სადაც ახალი კომპანია "მეტა ჰაბი" დააფუძნეს.
"მეტა ჰაბის" დაგეგმარებისას დამფუძნებლებმა აქცენტი საერთაშორისო სტანდარტების დანერგვაზე გააკეთეს. დავით ზაუტაშვილის თქმით, ტერიტორიის პროექტირება კვლევებზე დაყრდნობით განხორციელდა:
"დავეყრდენით კვლევებს, გამოვითხოვეთ მასალები და დავადგინეთ, თუ რა საერთაშორისო სტანდარტები არსებობდა. ადრე, მაგალითად, 10 000 კვადრატული მეტრიდან 8 000-ზე საწყობი შენდებოდა, ხოლო 2 000 კვადრატული მეტრი საავტომობილო ინფრასტრუქტურისთვის რჩებოდა. ჩვენ პროექტი საერთაშორისო სტანდარტით, 50/50-ზე პროპორციით გავაკეთეთ და გვაქვს დიდი საპარკინგე სივრცე როგორც ტრაილერებისთვის, ისე მცირე ზომის, სადისტრიბუციო ავტომობილებისთვის... შესაბამისად, თუ ვინმეს აქვს პრობლემა, საწყობის დაქირავებისას სად გააჩეროს საკუთარი თუ სადისტრიბუციო ტრანსპორტი, ეს პრობლემა ჩვენთან მთლიანად გადაჭრილია", - ამბობს "მეტა ჰაბის" თანადამფუძნებელი.
