ვიმედოვნებთ, რომ ამ მიმართულებით პრობლემები არ შეიქმნება - სტალინის მუზეუმი უცხოელი გიდების საქმიანობის აკრძალვაზე

1-ლი მაისიდან უცხოელ გიდებს საქართველოში ჯგუფური ტურების ჩატარება აეკრძალათ. აღნიშნულ ცვლილებასთან დაკავშირებით BM.GE გორში მდებარე სტალინის სახელმწიფო მუზეუმს დაუკავშირდა, რომელიც საქართველოს მუზეუმებს შორის ერთ-ერთი ყველაზე მონახულებადია.

მუზეუმში აცხადებენ, რომ ამ ეტაპზე სერვისის მიწოდებას შეუფერხებლად შეძლებენ, რადგან დაწესებულებას მრავალენოვანი გიდების რესურსი უკვე გააჩნია.

„სტალინის სახელმწიფო მუზეუმში გვყავს ქართულენოვანი, ინგლისურენოვანი, რუსულენოვანი და ფრანგულენოვანი გიდები. არის შემთხვევები, როდესაც ტურისტულ კომპანიას ჰყავს თარჯიმანი და ლექციას ჩვენი გიდი ატარებს. ეს ეხება იმ ვიზიტორებს, რომლებიც აღნიშნულ ენებს არ ფლობენ“, – განუცხადეს მუზეუმში.

მათივე ინფორმაციით, მუზეუმი აქტიურად თანამშრომლობს ტურისტულ კომპანიებთან და შესაბამისი ხელშეკრულებებიც გაფორმებული აქვს. ადმინისტრაციაში იმედოვნებენ, რომ კომპანიები ახალი რეგულაციების პირობებშიც უზრუნველყოფენ ნებართვის მქონე გიდების ჩართულობას: „ვთანამშრომლობთ ტურისტულ კომპანიებთან და ვიმედოვნებთ, რომ მათ ეყოლებათ შესაბამისი ნებართვის მქონე გიდები, რის შედეგადაც ამ მიმართულებით პრობლემები არ შეიქმნება“, – აცხადებენ მუზეუმში.

1 მაისიდან „შრომითი მიგრაციის შესახებ“ საქართველოს კანონში შეტანილი ცვლილებების აღსრულების ახალი ეტაპი დაიწყო. შრომის ინსპექციის სამსახური უფლებამოსილია შეამოწმოს, რამდენად იცავენ დამსაქმებლები და უცხოელი დასაქმებულები კანონით გათვალისწინებულ რეგულაციებს. დადგენილების მიხედვით, მთავრობამ მუდმივი ბინადრობის არმქონე უცხო ქვეყნის მოქალაქეებს კურიერებად, ტაქსის მძღოლებად და გიდებად მუშაობა აუკრძალა.

ახალი წესის №3 დანართის მიხედვით, შემდეგ საქმიანობებზე დაწესდა ნულოვანი კვოტა, რაც პრაქტიკულად ნიშნავს ამ სფეროების ჩაკეტვას უცხოელებისთვის:

• საკურიერო მომსახურება - კვოტა 0; • მგზავრების გადაყვანა (ტაქსი/ტრანსპორტი) კვოტა 0; • გიდების სერვისი - კვოტა 0.

კანონის ნორმებისთვის თავის არიდება გამოიწვევს დაჯარიმებას. ფინანსური სანქციები გავრცელდება როგორც კომპანიებზე, ისე დასაქმებულებზე, მათ შორის თვითდასაქმებულ უცხოელებზეც.