Visa-სთან პარტნიორობით, ChatGPT-ის მომხმარებლის ნაცვლად შოპინგი შეეძლება
გადახდების გიგანტმა Visa-მ თავისი ქსელი ChatGPT-ში ჩააშენა, რაც ჩატბოტს მომხმარებლის სახელით, დამოუკიდებლად შოპინგისა და ტრანზაქციების შესრულების საშუალებას აძლევს.
პარტნიორობის ფარგლებში AI აგენტებს არა მხოლოდ პროდუქტებისთვის რეკომენდაციის გაწევა, არამედ ნებისმიერ სავაჭრო ობიექტში, რომელიც Visa-ს იღებს, შესყიდვების დასრულებაც შეუძლიათ. მანამდე მსგავსი ტექნოლოგიური მცდელობები მხოლოდ ერთ კონკრეტულ საცალო მოვაჭრესთან ან დარეგისტრირებულ მაღაზიათა მცირე ჯგუფთან იყო შესაძლებელი.
OpenAI უზრუნველყოფს ტექნოლოგიას, რომელიც აგენტებს ChatGPT-ის მეშვეობით ინტერაქციის, გადაწყვეტილებების მიღებისა და შესყიდვების ინიციირების საშუალებას აძლევს. ჩინეთის მიღმა მსოფლიოს უდიდესი საგადამხდელო ქსელი Visa კი გადახდის ავტორიზაციასა და თაღლითობის მონიტორინგს უზრუნველყოფს.
"რადგან AI აგენტები ეკონომიკის აქტიური მონაწილეები ხდებიან, Visa-ს მთავარი მიზანია, უზრუნველყოს ტრანზაქციების სანდოობა, უსაფრთხოება და შეუფერხებლობა", - განაცხადა კომპანიის პროდუქტებისა და სტრატეგიის მთავარმა ოფიცერმა ჯეკ ფორესტელმა.
სან-ფრანცისკოში გამართულ ღონისძიებაზე საუბრისას ფორესტელმა მოიყვანა მაგალითი: მომხმარებელი სთხოვს ChatGPT-ს, მოძებნოს უსადენო ყურსასმენები 150 დოლარზე ნაკლებ ფასად. ჩატბოტი იპოვის შესაფერის წყვილს და მომხმარებლის სახელით შეიძენს მას.
ფუნქციის გასააქტიურებლად მომხმარებლებმა თავიანთი Visa-ბარათები ChatGPT-ს უნდა დაუკავშირონ. მომხმარებელთა დასაცავად და თაღლითობის მინიმიზაციისთვის იმოქმედებს გარკვეული ბარიერები, მათ შორის დანახარჯების ლიმიტები, სავალდებულო დასტურის ეტაპები და დამტკიცებული სავაჭრო ობიექტების სია.
ფორესტელის თქმით, Visa დავებს იმავე წესებით განიხილავს, რასაც სხვა ნებისმიერი ტრანზაქციის შემთხვევაში იყენებს - მაგალითად, გადაამოწმებს, ნამდვილად სურდა თუ არა მომხმარებელს შესყიდვა და სწორად დაამუშავა თუ არა ის სავაჭრო ობიექტმა.