ვისაც ქართულ გასტრონომიაში ინვესტიციის ჩადება სურს, ხშირად უცხოეთში ხსნის რესტორანს - ახალი ტენდენციაა|რესტორატორი
"ახალი ტენდენციაა: ვისაც ქართულ გასტრონომიაში ინვესტიციის ჩადების სურვილი აქვს, ხშირ შემთხვევაში უცხოეთში ხსნის რესტორანს", - ამის შესახებ რესტორატორთა ასოციაციის ვიცე-პრეზიდენტმა შოთა ბურჯანაძემ BMGTV-ის გადაცემა “წერტილში” განაცხადა, სადაც ინტერვიუს ერთ-ერთი თემა საქართველოს სარესტორნო ბიზნესის საინვესტიციო მიმზიდველობა იყო.
საქსტატის მონაცემებით, მიმდინარე წლის პირველ სამ თვეში სასტუმროებისა და რესტორნების სფეროში სულ რაღაც 202 ათასი დოლარის პირდაპირი უცხოური ინვესტიციები ჩაიდო. ასეთი დაბალი მაჩვენებელი ამ სექტორში პანდემიურ, 2020 წლის პირველ კვარტალშიც კი არ დაფიქსირებულა. შედარებისთვის: შარშან სექტორში 43 მილიონი დოლარის უცხოური ინვესტიცია შემოვიდა. თუ ბოლო ხუთ წელს შევხედავთ, FDI პანდემიამდელ ნიშნულს ჯერ კიდევ ვერ უბრუნდება. ყველაზე კარგი პერიოდი 2022 წელი იყო - 64 მილიონით.
შოთა ბურჯანაძე მიიჩნევს, რომ სტუმარმასპინძლობის სექტორში ინვესტიციების კლებადი ტენდენცია, პირველ რიგში, ქვეყანაში არსებულ არასტაბილურ გარემოსა და პოლიტიკურ რყევებს უკავშირდება.
რესტორატორი წუხს იმის გამოც, რომ რისკის ქვეშ დგას სექტორისთვის სასიცოცხლოდ მნიშვნელოვანი ევროპული ვიზალიბერალიზაცია, რომლის დაკარგვაც ქართულ ტურიზმს სერიოზულ პრობლემებს შეუქმნის.
- ჩვენ ძალიან კარგ რელსებზე ვიყავით, როდესაც ევროპელები მივაჩვიეთ ჩვენს კულტურას. ევროპამ შეითვისა და მოეწონა ქართული სამზარეულო, აქ ზუსტად იმ ენერგიას იღებდნენ, რაც ჩვენს ქვეყანას გააჩნია და ამიტომაც იყო მათთვის საქართველო ყოველთვის სასურველი ადგილი. ახლა რაც ხდება ევროპასთან მიმართებით, ჩემთვის ძალიან გულსატკენი და წარმოუდგენელია… იმ შემთხვევაში, თუ დავკარგავთ ვიზალიბერალიზაციას, ეს მხოლოდ ჩვენი პირადი პრობლემა არ იქნება, რომ სადმე ვიზის გარეშე ვერ წავალთ - ეს იქნება მთლიანად ტურისტული სფეროს უდიდესი პრობლემა. ის, რაც დასავლეთიდან საქართველოში ქუთაისის აეროპორტმა, ბათუმის აეროპორტმა და შემდეგ ამ სფეროში განვითარებულმა სხვადასხვა მიმართულებებმა შეძლო, ეს ყველაფერი მოკვდება. თუ ქვეყანაში არ იქნება იაფი ფრენები, არავითარ შემთხვევაში არ შეგვინარჩუნდება ის, რაც დღეს გვაქვს. ვიზალიბერალიზაციის საფრთხე ჩვენი სფეროსთვის ყველაზე დიდი პრობლემაა.