ვოლგოგრადის ოლქში რუსეთის უმსხვილესი ცემენტის ქარხანა იწვის

რუსეთის ვოლგოგრადის ოლქის ქალაქ მიხაილოვკაში მდებარე ქარხანა Себряковцемент-ის ტერიტორიაზე 15 სექტემბრის ღამეს ძლიერი აფეთქებები მოხდა.

თავდასხმის შედეგად ობიექტზე ხანძარი გაჩნდა და ტერიტორია სქელმა კვამლმა დაფარა. OSINT-ანალიტიკოსებმა დარტყმის ძირითადი კერა მეხუთე საწარმოო ღუმელთან დააფიქსირეს. საუბარია მონაკვეთზე, რომელიც ქარხნის ერთ-ერთ საკვანძო საწარმოო ხაზს შეადგენს.

რუსულ სოციალურ ქსელებში გავრცელებული ცნობების მიხედვით, თავდასხმის შედეგად ორი ადამიანი დაიღუპა. თავად რუსეთის თავდაცვის სამინისტრომ კი დილის საინფორმაციო ბრიფინგზე ვოლგოგრადის ოლქი საერთოდ არ ახსენა. უწყებამ დრონებით თავდასხმის სამიზნე სხვა რეგიონები დაასახელა, ამ ობიექტზე კი კომენტარის გაკეთებას თავი აარიდა.

ცნობისთვის, Себряковцемент-ი წლიურად 4 მილიონ ტონაზე მეტ ცემენტსა და 3 მილიონ ტონა კლინკერს აწარმოებს. საწარმოში 1,500-ზე მეტი ადამიანი მუშაობს, ქარხნის წილი კი რუსეთის ცემენტის საერთო წარმოების დაახლოებით 6%-ს შეადგენს. სწორედ ეს მასშტაბი აქცევს კომპანიას რუსეთის სამშენებლო და სამრეწველო ინფრასტრუქტურისთვის სტრატეგიული მნიშვნელობის აქტივად.