ზოგიერთისთვის კორუფცია ორგანულია და ვერ ხვდებიან, რატომ ვართ გაბრაზებული გუნდის ყოფილ ლიდერზე - კობახიძე

ირაკლი კობახიძის განცხადებით, „ქართული ოცნების“ ყოფილი ლიდერი [ირაკლი ღარიბაშვილი] კორუფციაში იყო გახვეული, ხოლო ზოგიერთი ადამიანისთვის კორუფცია „ორგანულია“ და ვერ იგებენ, რატომ არის საზოგადოება თუ მმართველი გუნდი ამის გამო გაბრაზებული.

როგორც კობახიძემ ჟურნალისტებთან საუბრისას აღნიშნა, ქვეყანაში არსებულ სერიოზულ პრობლემებს, მათ შორის კორუფციასთან დაკავშირებით, ვერავინ გადაფარავს ყალბი კამპანიებით.

„ძალიან სამწუხაროა, როდესაც ასეთი მოვლენები ვითარდება ჩვენს ქვეყანაში. იყო უამრავი პრობლემა და ამ პრობლემებს ვერავინ გადაფარავს ყალბი კამპანიებით. იყო სერიოზული პრობლემები კორუფციასთან დაკავშირებით. არიან ადამიანები, რომელთათვისაც, როგორც ჩანს, კორუფცია არის ორგანული და მათ არც კი ესმით, რატომ შეიძლება ხალხი და მათ შორის გუნდი იყოს გაბრაზებული კონკრეტულ ადამიანებზე, გუნდის ყოფილ ლიდერზე იმისათვის, რომ ის იყო გახვეული კორუფციაში“, - განაცხადა ირაკლი კობახიძემ.

პრემიერ-მინისტრის თქმით, ნაწილს უბრალოდ არ ესმის, რომ კორუფცია ცუდია და რატომ იწვევს ეს საზოგადოებრივ უკმაყოფილებას.

„არიან ადამიანები, რომლებსაც ეს უბრალოდ არ ესმით, რომ კორუფცია არის ცუდი და რატომ შეიძლება, ვიღაც იყოს შენზე გაბრაზებული ხალხი თუ გუნდი, იმის გამო, რომ შენ იყავი ჩართული კორუფციაში. ეს მათი საქმეა. ჩვენი საქმე არის სამართლის აღსრულება ყველა საკითხთან დაკავშირებით“, - აღნიშნა მან.