კალასი: სირთულეები გვაქვს საქართველოსთან, რეალურად არ გვაქვს კავშირი მთავრობასთან

ბრიუსელში ევროკავშირის წევრი ქვეყნების საგარეო საქმეთა მინისტრების შეხვედრამდე, ევროკავშირის უმაღლესმა წარმომადგენელმა კაია კალასმა საქართველოს შესახებ დასმულ შეკითხვებს უპასუხა.

"შავი ზღვის სტრატეგია, რომელიც ჯერ კიდევ გასული წლიდან გვაქვს შემუშავებული, ახლა უკვე განხორციელების ფაზაშია. სხვადასხვა ქვეყნები შავი ზღვის გარშემო, რა თქმა უნდა, ამის მნიშვნელოვანი ნაწილი არიან.

ახლა ჩვენ ასევე გარკვეული სირთულეები გვაქვს საქართველოსთან დაკავშირებით, რადგან რეალურად არ გვაქვს კავშირი მთავრობასთან და ჩვენ არ გვსურს მთავრობის მხარდაჭერა, ჩვენ გვინდა, მხარი დავუჭიროთ ქართველ ხალხს. ჩვენ ასევე გვქონდა დისკუსიები იმის შესახებ, როგორ შეგვიძლია, ეს საუკეთესოდ გავაკეთოთ, რომ ხალხმა ევროპის იმედი არ დაკარგოს", - თქვა კალასმა.

ბრიუსელში დღეს ევროკავშირის წევრი ქვეყნების საგარეო საქმეთა მინისტრების შეხვედრა გაიმართება. შეხვედრაზე განსახილველი ერთ-ერთი საკითხი იქნება "ევროპული კავშირის სტრატეგიული მიდგომა შავი ზღვის რეგიონის მიმართ".