კიევზე რუსეთის მასირებული იერიშის შედეგად 1 ადამიანი დაიღუპა, 8 დაშავდა

რუსეთის ძალებმა 19 ივლისის ღამეს კიევზე მასირებული სარაკეტო იერიში მიიტანეს. უკრაინის საგანგებო სიტუაციების სახელმწიფო სამსახურის ინფორმაციით, თავდასხმის შედეგად ერთი ადამიანი დაიღუპა, რვა კი დაშავდა.

უწყების ცნობით, აფეთქებები და ხანძრები დედაქალაქის სულ მცირე ხუთ რაიონში – დნიპროვსკის, დესნიანსკის, სოლომიანსკის, შევჩენკივსკისა და სვიატოშინსკის რაიონებში დაფიქსირდა.

სოლომიანსკის რაიონში ცეცხლი გაუჩნდა საოფისე შენობას, დაზიანდა 9-სართულიანი საცხოვრებელი კორპუსი, სადაც დაახლოებით 200 კვადრატულ მეტრზე ხანძრის ლიკვიდაცია მიმდინარეობდა. ასევე დაიწვა არასაცხოვრებელი შენობაც.

შევჩენკივსკის რაიონში ხანძარი სამსართულიან შენობას მოედო, დაიწვა 10-ზე მეტი გაჩერებული ავტომობილი, ხოლო ახლომდებარე 25-სართულიან საცხოვრებელ კორპუსში ფანჯრები ჩაიმსხვრა.

სვიატოშინსკის რაიონში ხანძარი კერძო საცხოვრებელი სახლის სახურავზე გაჩნდა, დესნიანსკის რაიონში კი არასაცხოვრებელი შენობა დაიწვა.

დნიპროვსკის რაიონში ხანძარი ავტომობილებს, არასაცხოვრებელი შენობის ტერიტორიასა და ოთხსართულიან საერთო საცხოვრებელს გაუჩნდა.

უკრაინის საგანგებო სიტუაციების სახელმწიფო სამსახურის ინფორმაციით, შემთხვევის ადგილებზე სამაშველო ჯგუფები და შესაბამისი სამსახურები მუშაობენ.

წინასწარი ინფორმაციით, რუსეთის საოკუპაციო ძალებმა კიევს ბალისტიკური რაკეტებით შეუტიეს. ადგილობრივი ხელისუფლების ცნობით, დედაქალაქზე ერთ საათზე ნაკლებ დროში 40-ზე მეტი რაკეტა გაუშვეს. შედეგად დაზიანდა საცხოვრებელი სახლები, სავაჭრო ცენტრი, სხვა შენობები და ავტომობილები.