კრემლი: რუსეთი უკრაინაში ომის დასრულების შესახებ ტრამპის ახალ წინადადებებს დაელოდება

კრემლის პრესსპიკერის, დიმიტრი პესკოვის განცხადებით, რუსეთი მიიჩნევს, რომ აშშ-ის პრეზიდენტი დონალდ ტრამპი გულწრფელია უკრაინის ომის დასრულების მცდელობებში და მოსკოვი ვაშინგტონისგან ახალ სამშვიდობო წინადადებებს ელოდება.

მიუხედავად იმისა, რომ შეერთებული შტატები კიევისთვის იარაღის მიწოდებას აგრძელებს, კრემლი აცხადებს, რომ მზადაა დიპლომატიური არხები ღია დატოვოს.

„დიახ, სამხედრო გზა არ არის სასურველი, მაგრამ მშვიდობის პერსპექტივის არარსებობის გათვალისწინებით, ჩვენ პროცესს სრულ გამარჯვებამდე მივიყვანთ. თუმცა, ამავდროულად, დაველოდებით ამერიკული მხარის ახალ წინადადებებს“, — აღნიშნა პესკოვმა სახელმწიფო ტელევიზიასთან ინტერვიუში.

კრემლის წარმომადგენელმა ხაზი გაუსვა, რომ ვაშინგტონის წინა ინიციატივა მოსკოვისთვის მისაღები იყო, თუმცა პროცესი უკრაინულმა მხარემ ჩაშალა.

რუსეთს, უკრაინასა და აშშ-ს შორის ბოლო სამმხრივი სამშვიდობო მოლაპარაკებები თებერვალში გაიმართა — ახლო აღმოსავლეთში ვითარების ესკალაციამდე. მოსკოვში იმედოვნებენ, რომ აშშ-ის შუამავლობით მიმდინარე პროცესი რეგიონული კრიზისის განმუხტვის შემდეგ კვლავ აქტიურ ფაზაში შევა.

ამ კვირაში აზიაში აშშ-ისა და რუსეთის უმაღლესი დიპლომატების ხანმოკლე შეხვედრაც შედგა. თუმცა, იმის გათვალისწინებით, რომ ვაშინგტონი პარალელურად უკრაინის შეიარაღებას განაგრძობს, კრემლი აშშ-ის პოზიციას ორმაგს უწოდებს, თუმცა აცხადებს, რომ შეეცდება ეს ვითარება საკუთარი ინტერესების სასარგებლოდ გამოიყენოს.