რუმინეთმა სამი დღის განმავლობაში მესამე, სავარაუდოდ რუსული, დრონი ჩამოაგდო

რუმინეთის პრეზიდენტის, ნიკუშორ დანის განცხადებით, ქვეყნის სამხედრო-საჰაერო ძალებმა რუმინეთის ტერიტორიულ წყლებზე კიდევ ერთი უპილოტო საფრენი აპარატი გაანადგურეს. მისი თქმით, ეს ბოლო სამი დღის განმავლობაში მსგავსი მესამე შემთხვევაა.

პრეზიდენტის ინფორმაციით, ინციდენტი დღეს, ადგილობრივი დროით 10:13 საათზე, სულინა–კილიის რაიონში მოხდა, სადაც F-16 ტიპის გამანადგურებელმა დრონი ჩამოაგდო.

ნიკუშორ დანმა მადლობა გადაუხადა სამხედრო მფრინავებსა და სახმელეთო პერსონალს პროფესიონალიზმისა და ეფექტიანი მოქმედებისთვის.

მისივე თქმით, გენერალური პროკურატურის მიერ ჩატარებული გამოძიებით დადგინდა, რომ პარასკევს ჩამოგდებული უპილოტო საფრენი აპარატი ირანული წარმოების „შაჰედის“ ტიპს მიეკუთვნებოდა, რომელსაც რუსეთი უკრაინის წინააღმდეგ ომში იყენებს.

პრეზიდენტის განცხადებით, შაბათსა და კვირას ჩამოგდებულ დრონებთან დაკავშირებით გამოძიება კვლავ მიმდინარეობს. მისი თქმით, სწორედ ამ გამოძიების შედეგებზე იქნება დაფუძნებული რუმინეთის დიპლომატიური პროტესტი რუსეთის მიმართ.

„მიუღებელი და აუტანელია, რომ რუსეთის ფედერაცია აგრძელებს რუმინეთის საჰაერო სივრცის დარღვევას, რომელიც ამავდროულად ნატოსა და ევროკავშირის საჰაერო სივრცეა. ასეთ ქმედებებს ჩვენ ჩვენს მოკავშირეებთან ერთად მთელი სერიოზულობით ვეკიდებით“, – განაცხადა ნიკუშორ დანმა.