თეთრი სახლი რუსეთ-უკრაინის მოლაპარაკებებში ცენტრალური სადაზვერვო სააგენტოს ჩართვას გეგმავს

გამოცემა Financial Times-ის ინფორმაციით, თეთრი სახლი განიხილავს რუსეთ-უკრაინის სამშვიდობო მოლაპარაკებებში CIA-ის დირექტორის, ჯონ რეტკლიფის ჩართულობის გაზრდას. წყაროების ცნობით, აშშ-ის ადმინისტრაცია გეგმავს შეამციროს პრეზიდენტის სპეცწარმომადგენლის, სტივ უიტკოფისა და ჯარედ კუშნერის როლი, რომლებიც აქამდე კიევსა და მოსკოვთან დიალოგს უძღვებოდნენ.

რეტკლიფთან დაახლოებულმა ოფიციალურმა პირებმა ევროპელ კოლეგებს უკვე აცნობეს, რომ დაზვერვის ხელმძღვანელი დიპლომატიურ პროცესში უფრო აქტიურად ჩაერთვება და ორივე ქვეყნის სპეცსამსახურებთან პირდაპირ კონტაქტს შეინარჩუნებს.

თუმცა, FT-ის ცნობით, დონალდ ტრამპს საბოლოო გადაწყვეტილება ჯერ არ მიუღია. სტივ უიტკოფი სავარაუდოდ შეინარჩუნებს სპეცგზავნილის პოსტს და ახლო აღმოსავლეთის მიმართულებას უხელმძღვანელებს, ხოლო უკრაინის საკითხზე შესაძლოა რეტკლიფთან ერთად განაგრძოს მუშაობა. გამოცემის წყაროები აღნიშნავენ, რომ ადმინისტრაციის შიგნით რეტკლიფსა და უიტკოფს შორის გავლენების გადანაწილებაზე დისკუსია კვლავ მიმდინარეობს.