რუსეთმა დროებით ოკუპირებული აფხაზეთის 2026-2030 წლების სოციალურ-ეკონომიკური პროგრამა დაამტკიცა

რუსეთის პრეზიდენტმა ვლადიმირ პუტინმა დაამტკიცა დროებით ოკუპირებული აფხაზეთის 2026-2030 წლების სოციალურ-ეკონომიკური განვითარების სახელმწიფო პროგრამის ხელშეწყობის შეთანხმება, რომელსაც ხელი 2025 წლის 27 დეკემბერს მოეწერა და რომლის რატიფიცირების შესახებაც ინფორმაცია რუსეთის სამართლებრივი აქტების პორტალზე გამოქვეყნდა.

რუსული სახელმწიფო მედიის ცნობით, დოკუმენტის მიზანია სოციალურ-ეკონომიკური თანამშრომლობის სრულყოფა, მოსახლეობის ცხოვრების დონის ამაღლება და ეკონომიკური და საინვესტიციო აქტივობის ხელშეწყობა.

ფინანსური დახმარების სახსრები მიიმართება განათლების, ახალგაზრდული პოლიტიკისა და კულტურის სფეროებზე, ასევე საგანგებო სიტუაციების სამინისტროს, პროკურატურისა და სახელმწიფო დაცვის სამსახურის თანამშრომელთა ფულადი სარგოსა და სოციალური გარანტიების გაზრდაზე, ამასთან, „რია ნოვოსტის“ ცნობით, აფხაზეთში მუდმივად მცხოვრები რუსეთის მოქალაქეებისთვის მედიკამენტების მიწოდებაზე პასუხისმგებლობა ადგილობრივ ხელისუფლებას ეკისრება.

ე.წ. აფხაზეთის მთავრობის ინფორმაციით, 2026 წელს რუსული ფინანსური დახმარებიდან 6 მილიარდი რუბლის, ანუ დაახლოებით 74 მილიონი დოლარის გამოყოფაა გათვალისწინებული, საიდანაც 4.5 მილიარდი რუბლი სოციალურ-ეკონომიკურ განვითარებას, 1.3 მილიარდი რუბლი საბიუჯეტო ინვესტიციებს, ხოლო 0.2 მილიარდი რუბლი ეკონომიკის დარგების მხარდაჭერას მოხმარდება.

ამავდროულად, დასრულდა მოსკოვსა და სოხუმს შორის ხელმოწერილი კიდევ ერთი დოკუმენტის რატიფიცირებაც, რომლის ფარგლებშიც პუტინმა აფხაზეთთან „სამეცნიერო ხარისხების ურთიერთაღიარების შესახებ“ შეთანხმებაც დაამტკიცა.