უკრაინის ყოფილ ელჩს აშშ-ში, ოლჰა სტეფანიშინას სასამართლომ გირაო შეუფარდა

უკრაინის უმაღლესმა ანტიკორუფციულმა სასამართლომ ქვეყნის ყოფილ ელჩს აშშ-ში, ოლჰა სტეფანიშინას აღკვეთის ღონისძიების სახით 6 მილიონი გრივნის (დაახლოებით 134 000 აშშ დოლარი) ოდენობის გირაო შეუფარდა. სპეციალური ანტიკორუფციული პროკურატურა 13,1 მილიონ გრივნას ითხოვდა, თუმცა მოსამართლემ მოთხოვნა ნაწილობრივ დააკმაყოფილა.

სტეფანიშინამ განაცხადა, რომ მას აღნიშნული თანხა არ გააჩნია და გირაოს დასაფარად სახსრების მოძიება მოუწევს, ხოლო გადაწყვეტილების გასაჩივრების საკითხს ადვოკატებთან კონსულტაციის შემდეგ გადაწყვეტს.

სტეფანიშინას წინააღმდეგ საქმე უკრაინის ეროვნულმა ანტიკორუფციულმა ბიურომ და სპეციალურმა ანტიკორუფციულმა პროკურატურამ აღძრეს. გამოძიების ვერსიით, იგი ეჭვმიტანილია უკანონო გამდიდრებასა და დეკლარაციაში ყალბი მონაცემების შეტანაში — კერძოდ, მან დეკლარაციაში არ ასახა კიევში მდებარე ორი ბინა, მათი რემონტისა და საცხოვრებლის იჯარის ხარჯები, Mercedes-ის მარკის ავტომობილით სარგებლობა, ასევე ავიაბილეთებისა და დედის მკურნალობის საფასური. უკრაინის სისხლის სამართლის კოდექსით, აღნიშნული ბრალდება 10 წლამდე თავისუფლების აღკვეთას ითვალისწინებს.

თავად ყოფილი ელჩი ბრალდებებს უარყოფს და აცხადებს, რომ დასამალი არაფერი აქვს, ხოლო შექმნილი აჟიოტაჟი „ჭიქაში ქარიშხალს“ წააგავს.

ოლჰა სტეფანიშინა აშშ-ში უკრაინის ელჩის პოსტს 2025 წლის აგვისტოდან იკავებდა. პრეზიდენტმა ვოლოდიმირ ზელენსკიმ იგი თანამდებობიდან 2026 წლის 3 აგვისტოს გაათავისუფლა. სტეფანიშინას განმარტებით, პოსტის დატოვება მისი პირადი გადაწყვეტილება იყო. დიპლომატიურ მისიამდე მას ეჭირა ვიცე-პრემიერის პოსტი ევროპული და ევროატლანტიკური ინტეგრაციის საკითხებში, იყო იუსტიციის მინისტრი და პრეზიდენტის სპეციალური წარმომადგენელი აშშ-თან ურთიერთობების მიმართულებით.