გაუჩინარებული გურამ დადიანიძის ფეისბუქ-პოსტის გამოქვეყნება წინასწარ დაიგეგმა

საქართველოს შინაგან საქმეთა სამინისტრომ დუშეთის მუნიციპალიტეტში გაუჩინარებული არასრულწლოვნის, გურამ დადიანიძის სოციალურ ქსელში გავრცელებულ პოსტთან დაკავშირებით ჩატარებული მოკვლევის შედეგები გამოაქვეყნა.

უწყების ცნობით, მცხეთა-მთიანეთის პოლიციის დეპარტამენტის თანამშრომლების მიერ ჩატარებული ინტენსიური საგამოძიებო მოქმედებებით დადგინდა, რომ 18 აგვისტოს გამოქვეყნებული სტატუსის შესახებ ინფორმაციას წინასწარ ფლობდნენ დაკარგულის დედა, სოფო ბიბილაშვილი და ადვოკატი ტარიელ კაკაბაძე.

როგორც ირკვევა, პოსტის გამოქვეყნება წინასწარ დაიგეგმა „ტელეგრამის“ სპეციალურ ჯგუფში, რომელშიც არასრულწლოვნის დედის ახლო ნათესავი და სხვა დაინტერესებული პირები იყვნენ გაერთიანებული.

ჯგუფის წევრებმა გაარკვიეს, რომ ტელეფონის ნომერი, რომლითაც დადიანიძის „ფეისბუქ“ პროფილი იყო რეგისტრირებული, თავისუფალი იყო და ახალი მფლობელი არ ჰყავდა. მას შემდეგ, რაც აღნიშნული ნომერი ჯგუფის ერთ-ერთმა წევრმა შეიძინა, მათ შეძლეს სოციალურ ქსელში შეღწევა, ხოლო უშუალოდ სტატუსი პროფილზე ჯგუფის იმ წევრმა გამოაქვეყნა, რომელიც საქართველოს ფარგლებს გარეთ იმყოფება.

ამასთანავე, იმავე ნომერზე გააქტიურდა სხვადასხვა აპლიკაციებიც, მათ შორის WhatsApp-ი და Viber-ი. შინაგან საქმეთა სამინისტრო მოუწოდებს საზოგადოებას, ნუ გამოიყენებენ აღნიშნულ საქმეს გამოძიებისთვის ხელის შეშლის, საზოგადოების შეცდომაში შეყვანისა და დეზინფორმაციის გავრცელებისთვის.