კალაძე 21-ე სკოლაზე: სამინისტროს ჰქონდა მყისიერი რეაგირება, კითხვები არ უნდა არსებობდეს
"ქართული ოცნების" მერმა, კახა კალაძემ 21-ე სკოლის დემონტაჟის გადაწყვეტილების პროტესტთან დაკავშირებით საუბრისას აღნიშნა, რომ ბავშვები სხვა სკოლებში გადანაწილდებიან, შემდეგ კი "თანამედროვე სტანდარტების სკოლას" ააშენებენ.
კალაძის თქმით, 21-ე სკოლასთან დაკავშირებით სამინისტროს ჰქონდა მყისიერი რეაგირება და კითხვები არ უნდა არსებობდეს.
"შემიძლია, ავარიული საბავშვო ბაღების შენობების მაგალითი მოვიყვანო. წლების წინ ანალოგიური პრობლემები გვქონდა. მივიღეთ სამხარაულის ექსპერტიზის დასკვნა, რომ კონკრეტული შენობები იყო ავარიული, საჭიროებდა დაცლას. მყისიერი რეაგირება გვქონდა. რამე რომ ჩამოვარდეს სრული კატასტროფა მოხდება. ამაზე პასუხისმგებლობას ვინ იღებს, როცა დევს ავარიულობის შესახებ ოფიციალური დასკვნა იმ შენობაზე, სადაც უამრავი ახალგაზრდა ყოველდღიურად დადის.
სამინისტროს ჰქონდა მყისიერი რეაგირება, ამასთან დაკავშირებით კითხვები არ უნდა არსებობდეს. გადანაწილდებიან ბავშვები სხვადასხვა სკოლაში, შემდეგ კი თანამედროვე სტანდარტების სკოლა აშენდება", - თქვა კალაძემ.
ფორმულა
წყარო: formulanews.ge