POG: ჩალაუბანში ავტომობილი გაჩერებულ მანქანას და მოქალაქეებს შეეჯახა, დაიღუპა 2 ადამიანი

პროკურატურის ინფორმაციით, გურჯაანის მუნიციპალიტეტის სოფელ ჩალაუბანში კაცი ავტომობილით გაჩერებულ მანქანას და მოქალაქეებს შეეჯახა, რის შედეგადაც 2 ადამიანი დაიღუპა, 2-მა კი ჯანმრთელობის დაზიანებები მიიღო და კლინიკაში მკურნალობენ.

მომხდარზე გამოძიება მოძრაობის უსაფრთხოების წესის დარღვევის ფაქტზე დაიწყო, 1 პირს ბრალი წარედგინა.

"გამოძიებით დადგინდა, რომ მიმდინარე წლის 18 სექტემბერს, გურჯაანის მუნიციპალიტეტის სოფელ ჩალაუბანში, ბრალდებულმა ვერ უზრუნველყო ავტომობილის უსაფრთხოდ მართვა, შეეჯახა გაჩერებულ ავტომანქანას და მოქალაქეებს, რის შედეგადაც ორი პირი შემთხვევის ადგილზე გარდაიცვალა, ხოლო ორი პირი ჯანრმთელობის დაზიანებით საავადმყოფოში იქნა გადაყვანილი", - აღნიშნულია განცხადებაში.

დაკავებულს ბრალი საქართველოს სისხლის სამართლის კოდექსის 276-ე მუხლის მე-8 ნაწილით (ავტომობილის მოძრაობის უსაფრთხოების წესის დარღვევა იმის მიერ, ვინც ამ სატრანსპორტო საშუალებას მართავს, რამაც ორი ადამიანის სიცოცხლის მოსპობა გამოიწვია) წარედგინა.

დანაშაული 10-წლამდე პატიმრობას ითვალისწინებს.