უკრაინა ევროკავშირისგან თითქმის €3 მილიარდს მიიღებს

ევროკავშირის საბჭომ უკრაინისთვის თითქმის 3 მილიარდი ევროს ოდენობის მერვე გადახდა დაამტკიცა. თანხიდან დაახლოებით 800 მილიონი ევრო პირველად უკრაინის მხარდაჭერის სესხის ფარგლებში გაიცემა.

ევროკავშირის ინფორმაციით, გადახდა უკრაინის მიერ 10 დასახული მიზნის შესრულებას უკავშირდება. ამ დროისთვის ქვეყანამ უკრაინის გეგმით გათვალისწინებული 95 მიზნიდან 84 შეასრულა.

საბჭომ ასევე დაამტკიცა ნორვეგიის მიერ უკრაინისთვის 1 მილიარდი ნორვეგიული კრონის, დაახლოებით 92 მილიონი ევროს, უსასყიდლო ფინანსური კონტრიბუციის დამატება.

მერვე გადახდის შემდეგ უკრაინის მიერ ევროკავშირის „უკრაინის მექანიზმის“ ფარგლებში მიღებული თანხა 2024 წლის შუა პერიოდიდან 32 მილიარდ ევროს გადააჭარბებს.