უკრაინამ რუსეთში „გაზპრომის“ ნავთობგადამამუშავებელ ქარხანაზე იერიში მიიტანა

რუსეთის ბაშკორტოსტანის რესპუბლიკაში, ქალაქ სალავატში, „გაზპრომ ნეფტეხიმ სალავატის“ ნავთობგადამამუშავებელ ქარხანასთან ხანძარი გაჩნდა. უკრაინული მედიის ცნობით, ხანძარს უკრაინის მიერ განხორციელებული თავდასხმა უძღოდა წინ.

უკრაინული გამოცემა „უკრაინსკა პრავდა“, Telegram-არხებზე Astra-სა და Exilenova+-ზე დაყრდნობით წერს, რომ ხანძარი ქალაქიდან რამდენიმე კილომეტრში, სავარაუდოდ, ნავთობგადამამუშავებელი კომპლექსის მიმდებარედ გაჩნდა.

„გაზპრომ ნეფტეხიმ სალავატი“ რუსეთის ერთ-ერთი უმსხვილესი ნავთობგადამამუშავებელი და ნავთობქიმიური კომპლექსია. საწარმო წელიწადში 10 მილიონ ტონამდე ნახშირწყალბადების ნედლეულს ამუშავებს.

სალავატი უკრაინის საზღვრიდან დაახლოებით 1 400 კილომეტრში მდებარეობს.

ეს კომპლექსი უკრაინული თავდასხმების სამიზნე ადრეც გამხდარა. 2025 წლის 24 სექტემბერს თავდასხმის შედეგად დაზიანდა პირველადი ნავთობგადამუშავების დანადგარი ELOU-AVT-6. 2026 წლის 14 ივლისს ქარხანაზე თავდასხმის შემდეგ ხანძარი გაჩნდა და ნავთობგადამუშავება სრულად შეჩერდა. კიდევ ერთი ხანძარი 2026 წლის 13 აგვისტოს თავდასხმის შემდეგ დაფიქსირდა.

ამ დროისთვის ხანძრის მასშტაბისა და მიყენებული ზარალის შესახებ დამატებითი ინფორმაცია არ გავრცელებულა.