უკრაინამ რუსეთის სიღრმეში მდებარე ნავთობგადამამუშავებელ ქარხნებზე იერიში მიიტანა

უკრაინის პრეზიდენტ ვოლოდიმირ ზელენსკის ცნობით, უკრაინულმა ძალებმა მორიგი მაღალი სიზუსტის დარტყმები განახორციელეს რუსეთის ტერიტორიაზე მდებარე სტრატეგიულ ობიექტებზე, მათ შორის ომსკის უმსხვილეს ნავთობგადამამუშავებელ ქარხანასა და უკრაინის საზღვრიდან 1 900 კილომეტრით დაშორებულ უხტას ნავთობგადამამუშავებელ საწარმოზე.

ზელენსკის განმარტებით, უხტაში მდებარე სამიზნეზე იერიში An-196 RS ტიპის დრონებით მიიტანეს, რომლებსაც 2 500 კილომეტრამდე მანძილის დაფარვა შეუძლიათ. ხოლო ომსკის ქარხნის წინააღმდეგ FP-6 ტიპის (მოდიფიცირებული „FP-1“) უპილოტო საფრენი აპარატები გამოიყენეს. ამასთანავე, პრეზიდენტის თქმით, დაზიანდა რუსული მხარის კიდევ ერთი მონაცემთა ცენტრი. ზელენსკიმ აღნიშნული ოპერაციები უკრაინაზე რუსეთის თავდასხმების სიმეტრიულ და მაღალზუსტ პასუხად შეაფასა.