ბიძინა ივანიშვილის გინებისთვის გიორგი კირვალიძეს 7-დღიანი ადმინისტრაციული პატიმრობა შეეფარდა

4 ოქტომბრის მოვლენების საქმეზე ბრალდებულ გიორგი კირვალიძეს სასამართლომ „ქართული ოცნების“ საპატიო თავმჯდომარის, ბიძინა ივანიშვილის შეურაცხყოფისთვის 7-დღიანი ადმინისტრაციული პატიმრობა შეუფარდა. მოსამართლის გადაწყვეტილებას კირვალიძის მხრიდან პროტესტი და პროცესზე ივანიშვილისა და მოსამართლის მისამართით დამატებითი შეურაცხმყოფელი რეპლიკები მოჰყვა.

გიორგი კირვალიძე იმ 30-ზე მეტ პირს შორის იყო, რომლებმაც პროკურატურას საპროცესო შეთანხმების თხოვნით თავად მიმართეს. შეთანხმების პირველადი პირობით, მათ 1-წლიანი პატიმრობა და 3-წლიანი პირობითი მსჯავრი ერგებოდათ. თუმცა, ივნისში გამართულ სხდომაზე, საპროცესო შეთანხმების გაფორმების შემდეგ, კირვალიძემ განაცხადა, რომ თავს დამნაშავედ არ ცნობდა და ივანიშვილის მისამართით გინება გამოიყენა.

აღნიშნულის გამო, აგვისტოს ბოლოს სააპელაციო სასამართლომ პროკურატურის შუამდგომლობის საფუძველზე მასთან საპროცესო შეთანხმება გააუქმა, მიუხედავად იმისა, რომ კირვალიძის განმარტებით, მისი სიტყვები ემოციურ აღელვებას უკავშირდებოდა.

კირვალიძეს ბრალი დამძიმებული მუხლებით აქვს წარდგენილი, რაც ჯგუფურ ძალადობაში მონაწილეობასა და სტრატეგიული ან განსაკუთრებული მნიშვნელობის ობიექტების ხელში ჩაგდებისა და ბლოკირების მცდელობას მოიცავს.