EU-მ რუსეთის სამხედრო-სამრეწველო კომპლექსის წინააღმდეგ სანქციების უპრეცედენტო პაკეტი დაამტკიცა

ევროკავშირმა რუსეთის სამხედრო-სამრეწველო კომპლექსში შემავალი 1 569 ფიზიკური და იურიდიული პირის წინააღმდეგ სანქციები დააწესა. ევროკავშირის საბჭოს განცხადებით, ეს სანქციების სიაში შეყვანის ყველაზე მასშტაბური პაკეტია, რომელიც ევროკავშირს ოდესმე შეუთანხმებია.

სანქცირებულთა შორის 826 რუსული კომპანია და ამ კომპანიების 743 ხელმძღვანელია. ახალი ზომების შედეგად, უკრაინის ტერიტორიული მთლიანობის მხარდასაჭერად მოქმედი სანქციების რეჟიმის ფარგლებში სანქცირებულთა საერთო რაოდენობა დაახლოებით 4 600-მდე გაიზარდა.

ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენლის, კაია კალასის განცხადებით, ახალი სანქციების ნახევარზე მეტი იმ საწარმოო ჯაჭვებს ეხება, რომლებიც ბალისტიკურ რაკეტებს აწარმოებენ — რაკეტებს, რომლებსაც რუსეთი უკრაინის მშვიდობიანი მოსახლეობის წინააღმდეგ იყენებს.

„ეს არ არის დრო, როდესაც მოსკოვზე ზეწოლა უნდა შევამსუბუქოთ — პირიქით, ის უნდა გავაძლიეროთ“, — განაცხადა კალასმა.

სანქციების ახალი პაკეტი რუსეთის სამხედრო მრეწველობის საშუალო რგოლის მომწოდებლებსაც მოიცავს. ევროკავშირის ინფორმაციით, ამ სექტორის წლიური ბრუნვა სულ მცირე 20 მილიარდ ევროს შეადგენს, ხოლო დასაქმებულთა რაოდენობა 250 000-ს აღემატება.

სანქცირებული კომპანიები რუსეთის მოწინავე შეიარაღების სისტემებისთვის საჭირო კომპონენტებს აწვდიან, მათ შორის რაკეტების, უპილოტო საფრენი აპარატებისა და თვითმფრინავების წარმოებისთვის. ჩამონათვალში შედის ელექტრონიკის, ნახევარგამტარების, მიკროსქემების, საკომუნიკაციო მოწყობილობების, რადარების, ასაფეთქებელი ნივთიერებების, საბრძოლო მასალისა და სანავიგაციო სისტემების მწარმოებლები და მომწოდებლები.

სანქციები ითვალისწინებს აქტივების გაყინვას და სანქცირებული პირებისა თუ კომპანიებისთვის თანხებისა და ეკონომიკური რესურსების პირდაპირ ან ირიბად გადაცემის აკრძალვას. ფიზიკურ პირებს ასევე ეკრძალებათ ევროკავშირის ტერიტორიაზე შესვლა და ტრანზიტით გადაადგილება.

ევროკავშირის საბჭოს განცხადებით, გადაწყვეტილება რუსეთის მიერ უკრაინაზე აგრესიის გაგრძელებასა და ესკალაციას, განსაკუთრებით კი სამოქალაქო ინფრასტრუქტურაზე ბოლო პერიოდში განხორციელებულ მასშტაბურ სარაკეტო და დრონებით თავდასხმებს უკავშირდება.

ევროკავშირმა სანქციების გაძლიერების გადაწყვეტილება 2026 წლის 18-19 ივნისის ევროპული საბჭოს მოწოდების შესაბამისად მიიღო.