რუბიო: „ზუსტად არ ვიცი“, მიიღო თუ არა კიევმა რუსული ბალისტიკური დარტყმის შესახებ გაფრთხილება

აშშ-ის სახელმწიფო მდივანმა, მარკო რუბიომ განაცხადა, რომ „ზუსტად არ იცის“, რატომ ვერ მიიღო, სავარაუდოდ, კიევმა წინასწარი გაფრთხილება რუსეთის მიერ 19 ოქტომბრის ღამეს განხორციელებული ბალისტიკური დარტყმების შესახებ.

რუბიოს თქმით, რამდენიმე ღამის წინ პრობლემა შეიქმნა პროგრამულ უზრუნველყოფასთან დაკავშირებით, რომელიც ადრეული შეტყობინების სისტემას ეხება. სახელმწიფო მდივანმა დასძინა, რომ ამის შესახებ მას აშშ-ის სამხედრო სარდლობამ წინა ინციდენტის განხილვის შემდეგ მოახსენა.

კითხვაზე, აშფოთებს თუ არა სახელმწიფო დეპარტამენტს კიევში ამერიკელი დიპლომატების უსაფრთხოება, რუბიომ აღნიშნა, რომ უწყება უსაფრთხოებაზე მსოფლიოს ნებისმიერ წერტილში ზრუნავს. მან განმარტა, რომ კიევში აშშ-ის წარმომადგენლობის შემადგენლობა არ შეცვლილა, თუმცა დიპლომატებისა და ობიექტების უსაფრთხოება მათი მუდმივი საზრუნავია.

აღსანიშნავია, რომ 13 ოქტომბერს უკრაინის პრეზიდენტმა ვოლოდიმირ ზელენსკიმ პარტნიორები უკვე გააკრიტიკა 12 ოქტომბრის თავდასხმისას გაფრთხილების გადაუცემლობის გამო. მოგვიანებით უკრაინის საჰაერო ძალების სპიკერმა, იური იგნატმა დააზუსტა, რომ შეტევის ოთხი ტალღიდან პირველის შესახებ გაფრთხილება მართლაც არ მიუღიათ.