14 სამხედროს დაღუპვის შემდეგ ყაზახეთის თავდაცვის მინისტრი თანამდებობიდან გადააყენეს

ყაზახეთის პრეზიდენტმა, ყასიმ-ჟომართ თოყაევმა ქვეყნის თავდაცვის მინისტრი, დაურენ ქოსანოვი თანამდებობიდან გადააყენა. სახელმწიფო მეთაურმა ეს გადაწყვეტილება მანგისტაუს ოლქში სამხედრო მოსამსახურეების დაღუპვის ტრაგიკული შემთხვევიდან სამი დღის შემდეგ მიიღო.

24 სექტემბერს, კასპიის ზღვის სანაპიროზე ყაზახეთის სამხედრო-საზღვაო ძალების წვრთნების დროს, 17 სამხედრო წყალში აღმოჩნდა. თავდაცვის სამინისტროს ცნობით, ამინდის მკვეთრმა გაუარესებამ და შტორმმა ისინი ღია ზღვაში გაიტაცა. მაშველებმა მხოლოდ სამი ადამიანის გადარჩენა შეძლეს, 14 კი დაიღუპა. დაღუპულები 19-დან 23 წლამდე ასაკის ახალგაზრდები იყვნენ.

მომხდართან დაკავშირებით თოყაევმა 25 სექტემბერი საყოველთაო გლოვის დღედ გამოაცხადა. მან ასევე გასცა განკარგულება სპეციალური კომისიის შექმნის შესახებ, რომელსაც თავდაცვის სამინისტროში არსებული მდგომარეობის კომპლექსური შემოწმება დაევალა.

მომხდართან დაკავშირებით აღძრულია სისხლის სამართლის საქმეები სამსახურებრივი გულგრილობისა და ნაოსნობის წესების დარღვევის მუხლებით. გამოძიებას უძღვება უწყებათაშორისი ოპერატიულ-საგამოძიებო ჯგუფი.

გამოძიების ფარგლებში უკვე დაკავებულია შეიარაღებული ძალების მაღალი რანგის ხუთი ოფიცერი. შინაგან საქმეთა სამინისტროს ცნობით, დაკავებულებს შორის არიან: სამხედრო-საზღვაო ძალების მთავარსარდლის პირველი მოადგილე, ორი სამხედრო ნაწილის მეთაური, საზღვაო ქვეითთა ასულის მეთაური და კატარღის მეთაური.