27-30 სექტემბერს თბილისი მაგიდის ჩოგბურთში მსოფლიოს ახალგაზრდული სერიის საერთაშორისო ტურნირს - WTT Youth Contender Tbilisi 2026 უმასპინძლებს

საქართველოს სპორტის სამინისტროს მხარდაჭერითა და საქართველოს მაგიდის ჩოგბურთის ფედერაციის ორგანიზებით, თბილისი მაგიდის ჩოგბურთში მსოფლიოს ახალგაზრდული სერიის საერთაშორისო ტურნირს - WTT Youth Contender Tbilisi 2026 უმასპინძლებს.

სპორტის სამინისტროს ინფორმაციით, ტურნირთან დაკავშირებით პრესკონფერენცია გაიმართა, რომელზეც სპორტის მინისტრის მოადგილე ირაკლი დოლაბერიძემ საქართველოში სპორტის ამ სახეობის განვითარებასა და მსგავსი ტურნირების ჩატარების მნიშვნელობაზე ისაუბრა. მან აღნიშნა, რომ სამინისტრო ხელს შეუწყობს ამ ტურნირის მაღალ დონეზე ჩატარებას.

პრესკონფერენციას ასევე ესწრებოდნენ მსოფლიოს ახალგაზრდული სერიის საერთაშორისო ტურნირის ხელმძღვანელი ანდრეს ლაროზა, საქართველოს მაგიდის ჩოგბურთის ფედერაციის გენერალური მდივანი ნინო ხვიჩია და საქართველოს მაგიდის ჩოგბურთის ახალგაზრდული ნაკრების მთავარი მწვრთნელი ნევენ ცეგნერი.

მსოფლიოს ახალგაზრდული სერიის საერთაშორისო ტურნირს საქართველო 27-30 სექტემბერს მეხუთედ უმასპინძლებს. ტურნირში მონაწილეობას მიიღებს 20 ქვეყნის 140 ახალგაზრდა სპორტსმენი, მათ შორის 39 ქართველი. მონაწილეები იასპარეზებენ U11, U13, U15, U17 და U19 ასაკობრივ კატეგორიებში, როგორც ერთეულთა, ასევე შერეულ წყვილთა თანრიგებში.

WTT Youth Contender Tbilisi 2026-ის ჩატარება საქართველოში ხელს უწყობს ახალგაზრდებში მაგიდის ჩოგბურთის პოპულარიზაციას, ახალგაზრდა სპორტსმენების საერთაშორისო გამოცდილების განვითარებასა და ქართული მაგიდის ჩოგბურთის მსოფლიოს სპორტულ სივრცეში წარმოჩენას.