7.7 მაგნიტუდის მიწისძვრას ინდონეზიაში, სულ მცირე, 20 ადამიანი ემსხვერპლა

ინდონეზიის აღმოსავლეთით, კუნძულ ფლორესის რეგიონში, შაბათს დილით 7.7 მაგნიტუდის სიმძლავრის ძლიერი მიწისძვრა მოხდა, რასაც, სულ მცირე, 20 ადამიანი ემსხვერპლა.

ხელისუფლებამ ცუნამის საფრთხის შესახებ გაფრთხილება გამოსცა, რომელიც მოგვიანებით გააუქმა, თუმცა რეგიონში ათობით განმეორებითი ბიძგი დაფიქსირდა, მათ შორის ერთი - 6.1 მაგნიტუდის სიმძლავრის.

რამდენიმე რაიონში დაფიქსირდა ერთ მეტრზე ნაკლები სიმაღლის ცუნამის ტალღებიც. ინდონეზიის გეოფიზიკის სააგენტოს (BMKG) ცნობით, პირველი ბიძგები ადგილობრივი დროით დილის 04:58 საათზე, 15 კილომეტრის სიღრმეზე დარეგისტრირდა.

საშველო სამსახურის ხელმძღვანელის, ფათჰურ რაჰმანის განცხადებით, საპორტო ქალაქ მაუმერეს მიდამოებში მაშველებმა 20 დაღუპული იპოვეს, ექვსი ადამიანი დაშავდა, ხოლო ორი ნანგრევებშია მოყოლილი.

აშშ-ის და ინდონეზიის ხელისუფლების ცნობით, მიწისძვრის ეპიცენტრი ფლორესის ჩრდილოეთ სანაპიროსთან, სანაპირო ქალაქ ენდედან ჩრდილო-დასავლეთით, დაახლოებით 68 კილომეტრში მდებარეობდა.