POLITICO: ევროპის ყველაზე დიდმა პოლიტიკურმა ჯგუფმა ევროპარლამენტში სპეციალური მოსმენის ჩატარება მოითხოვა, რათა ევროკომისარი მარტა კოსი ყოფილი იუგოსლავიის საიდუმლო პოლიციასთან თანამშრომლობის საკითხზე დაკითხონ

ევროკავშირის კონსერვატორებს სურთ ევროკომისარ მარტა კოსს დაუსვან მწვავე შეკითხვები იუგოსლავიის საიდუმლო პოლიციასთან დაკავშირებულ ბრალდებებზე. ინფორმაციას Politico ავრცელებს.

გამოცემის ცნობით, ევროპის ყველაზე დიდმა პოლიტიკურმა ჯგუფმა, ოთხშაბათს, ევროპარლამენტში სპეციალური მოსმენის ჩატარება მოითხოვა, რათა გაფართოების საკითხებში ევროკომისარი კოსი დაკითხონ იმ ბრალდებებზე, თითქოს, ათწლეულების წინ, ის იუგოსლავიის საიდუმლო პოლიციასთან თანამშრომლობდა.

როგორც Politico აღნიშნავს, ჯერ კიდევ 2024 წელს ევროპარლამენტში დამტკიცების დროს კოსმა უარყო ბრალდებები, რომ ის 1980-იან წლებში იუგოსლავიის დაზვერვის სააგენტოსთან თანამშრომლობდა. თუმცა, ბრალდებები კვლავ გაჩნდა გასულ კვირას, ერთ-ერთი ევროპარლამენტარის მხარდაჭერით „ევროპის სახალხო პარტიიდან“. აღსანიშნავია, რომ ეს პარტია არის ევროკომისიის პრეზიდენტისა და კოსის ხელმძღვანელის, ურსულა ფონ დერ ლაიენის პოლიტიკური ოჯახი.

როგორც გამოცემა აღნიშნავს, კოსის კაბინეტმა კომენტარის შესახებ მოთხოვნას არ უპასუხა. თუმცა, ევროკომისიის ერთ-ერთმა წარმომადგენელმა Politico-ს გასულ კვირას განუცხადა, რომ კოსმა გაიარა „შემოწმების ფართო და საფუძვლიანი პროცესი“, რაც აუცილებელია კომისრად დასანიშნად.

კომისრის ოფისთან დაახლოებულმა ოფიციალურმა პირმა, რომელმაც საკითხის მგრძნობიარობიდან გამომდინარე ანონიმურად ისაუბრა, აღნიშნა, რომ ეს ბრალდებები წარმოადგენს პოლიტიკურ შეტევას, რომლის მიზანია „ქულების მოპოვება სლოვენიის არჩევნებში“.

„ევროპის სახალხო პარტიის“ პრეზიდენტი, მანფრედ ვებერი ამჟამად მოითხოვს, რომ კოსის საკითხი ევროპარლამენტის საგარეო საქმეთა კომიტეტში განიხილონ. ნებისმიერი მოსმენა გაიმართება ევროპარლამენტის საგარეო საქმეთა კომიტეტში (AFET), რომელსაც თავმჯდომარეობს დევიდ მაკალისტერი - ევროპარლამენტარი „ევროპის სახალხო პარტიიდან“. თავმჯდომარე და ჯგუფის კოორდინატორები წყვეტენ, დაგეგმონ თუ არა კომიტეტის მოსმენები. კოსი ორშაბათს AFET-ის მოსმენაზე სიტყვით უნდა გამოსულიყო, თუმცა მან თავისი გამოსვლა გააუქმა.