ისრაელური გამოცემა Ynet: ვაშინგტონმა ომის დასრულების სამიზნე თარიღად 9 აპრილი დაადგინა

დონალდ ტრამპის განცხადებების კვალდაკვალ, ისრაელის ოფიციალურმა პირმა განაცხადა, რომ ვაშინგტონმა ომის დასრულების სამიზნე თარიღად 9 აპრილი დაადგინა, რაც საბრძოლო მოქმედებებისა და მოლაპარაკებების გასაგრძელებლად დაახლოებით 21 დღეს ტოვებს, - წერს ისრაელური გამოცემა Ynet-ი.

ოფიციალური პირის განცხადებით, ირანსა და შეერთებულ შტატებს შორის მოლაპარაკებები, სავარაუდოდ, ამ კვირის ბოლოს პაკისტანში გაიმართება.

მან ასევე დასძინა, რომ ვაშინგტონს ისრაელისთვის არ მიუწოდებია განახლებული ინფორმაცია ირანის პარლამენტის თავმჯდომარესთან, მოჰამად ბაღერ ღალიბაფთან კონტაქტების შესახებ.

აღნიშნული პირის თქმით, ომის ამ თარიღისთვის დასრულებამ შესაძლოა ტრამპს საშუალება მისცეს, ისრაელის დამოუკიდებლობის დღეს ეწვიოს ქვეყანას და ისრაელის პრემია მიიღოს.

ისრაელის თავდაცვის სფეროს წარმომადგენლები ვარაუდობენ, რომ იმ შემთხვევაშიც კი, თუ ირანთან საბრძოლო მოქმედებები მანამდე გაგრძელდება, თეირანი, სავარაუდოდ, შეინარჩუნებს ისრაელის მიმართულებით რაკეტების გაშვების სტაბილურ ტემპს - დღეში საშუალოდ 10 გაშვებას.