CNN: ირანის უზენაესი ლიდერის სამხედრო მრჩევლის განცხადებით, ომი მანამ გაგრძელდება, სანამ ირანი სრულ კომპენსაციას არ მიიღებს მიყენებული ზიანისთვის

ირანის უზენაესი ლიდერის, მოჯთაბა ხამენეის უფროსმა სამხედრო მრჩეველმა, მოჰსენ რეზაიმ განაცხადა, რომ ომი მანამ გაგრძელდება, სანამ ირანი სრულ კომპენსაციას არ მიიღებს მიყენებული ზიანისთვის. ინფორმაციას ამის შესახებ ტელეკომპანია CNN-ი ავრცელებს.

სატელევიზიო გამოსვლაში რეზაიმ ასევე პირობა დადო, რომ ირანი ბრძოლას მანამ გააგრძელებს, სანამ „ყველა ეკონომიკური სანქცია არ მოიხსნება და არ იქნება მიღებული იურიდიულად სავალდებულო საერთაშორისო გარანტიები ირანის საქმეებში აშშ-ის ჩარევის აღსაკვეთად“.

„ჩვენ ვხედავთ, რომ ჩვენი შეიარაღებული ძალები ოპერაციებსა და საქმიანობას მტკიცედ ახორციელებენ. ახალი ლიდერის არჩევით, ჩვენი მართვის პროექტი მყარად გადავიდა მის დაქვემდებარებაში“, - განაცხადა რეზაიმ.

მრჩეველი ამტკიცებს, რომ „ომი ფაქტობრივად დასრულდა“ ერთ კვირაზე მეტი ხნის წინ და რომ „შეერთებული შტატები მზად იყო შეჩერებულიყო და ცეცხლის შეწყვეტისთვის მიეღწია“. თუმცა, მისივე თქმით, ისრაელის პრემიერ-მინისტრმა, ბენიამინ ნეთანიაჰუმ „ომის გაგრძელებას დაუჭირა მხარი“.

რეზაიმ განაცხადა, რომ ომის მე-15 დღის შემდეგ „აშშ-მა ნათლად გააცნობიერა, რომ ამ ომში გამარჯვების გზა არ არსებობდა“.