ისრაელის თავდაცვის მინისტრის განცხადებით, „ცაჰალი“ ლიბანის სამხრეთ ნაწილს გააკონტროლებს

ისრაელის თავდაცვის მინისტრის, ისრაელ კაცის განცხადებით, ისრაელის თავდაცვის არმია („ცაჰალი“) ლიბანის სამხრეთ ნაწილს გააკონტროლებს.

ისრაელმა ლიბანში დაჯგუფება „ჰეზბოლას“ სამხედრო მომარაგების სატრანსპორტო გზები გადაუკეტა და მდინარე ლიტანიზე ხუთი ხიდი ააფეთქა. „ცაჰალი“ ლიბანში დაჯგუფება „ჰეზბოლას“ ინფრასტრუქტურაზე დარტყმებს განაგრძობს.

„ისრაელის თავდაცვის არმია ლიბანში „ჰეზბოლას“ წინააღმდეგ სრული ძალით იმოქმედებს. სამხრეთ ლიბანის ასობით ათასი ადამიანი, რომელიც ქვეყნის ჩრდილოეთში გაიხიზნა, არ დაბრუნდება მდინარე ლიტანის სამხრეთით მანამ, სანამ [ისრაელის] ჩრდილოეთში მცხოვრები ადამიანების უსაფრთხოება უზრუნველყოფილი არ იქნება“, - განაცხადა კაცმა ისრაელის შეიარაღებული ძალების მეთაურთან, ეიალ ზამირთან და სხვა მაღალჩინოსან სამხედროებთან შეხვედრის დროს.