კაია კალასი: აშშ-სა და ირანს შორის მიღწეული შეთანხმება - უფსკრულიდან უკან გადადგმული ერთი ნაბიჯია

ევროკავშირის უმაღლესმა წარმომადგენელმა საგარეო ურთიერთობათა საკითხებში, კაია კალასმა სოციალურ ქსელ X-ში დაწერა, რომ ის აშშ-სა და ირანს შორის მიღწეულ ორკვირიან ზავს მიესალმება.

როგორც კალასმა აღნიშნა, აშშ-სა და ირანს შორის მიღწეული შეთანხმება - უფსკრულიდან უკან გადადგმული ერთი ნაბიჯია.

„აშშ-სა და ირანს შორის ცეცხლის შეწყვეტის შესახებ მიღწეული შეთანხმება რამდენიმეკვირიანი ესკალაციის შემდეგ - უფსკრულიდან უკან გადადგმული ერთი ნაბიჯია. ის ქმნის შესაძლებლობას შერბილდეს მუქარები, შეჩერდეს სარაკეტო დარტყმები, განახლდეს ნაოსნობა და დიპლომატიისთვის შეიქმნას სივრცე მყარი შეთანხმების მისაღწევად. ჰორმუზის სრუტე უნდა გაიხსნას“, - დაწერა კალასმა.

მისი თქმით, ის დღეს პაკისტანის საგარეო საქმეთა მინისტრს, ისხაკ დარს ტელეფონით ესაუბრა და შუამავლობისთვის მადლობა გადაუხადა. „შუამავლობის შესაძლებლობა ღია უნდა რჩებოდეს, რადგან ომის პირვანდელი მიზეზები ჯერ კიდევ გადაუჭრელია“, - დასძინა კალასმა.

ევროკავშირის პირველი დიპლომატის განცხადებით, ბრიუსელი რეგიონში პარტნიორებთან კავშირზეა.

The U.S.–Iran agreement on a ceasefire is a step back from the brink after weeks of escalation. It creates a much-needed chance to tone down threats, stop missiles, restart shipping, and create space for diplomacy towards a lasting agreement. The Strait of Hormuz must be open… — Kaja Kallas (@kajakallas) April 8, 2026