Politico: გერმანელი კონსერვატორები ურსულა ფონ დერ ლაიენზე ზეწოლას აძლიერებენ, რათა ბრიუსელის „მანქანა“ დაშალოს

ულტიმატუმს სთავაზობენ: მან უნდა შეამციროს ბრიუსელის კონტროლი და ბიუროკრატიული ბარიერები, წინააღმდეგ შემთხვევაში კი კომისიის უფლებამოსილებების შეზღუდვის ახალ მცდელობებს დაუპირისპირდეს. ორშაბათს ბერლინში დაგეგმილ შეხვედრაზე გერმანიის კანცლერ ფრიდრიხ მერცის თანაპარტიელები აპირებენ ფონ დერ ლაიენს წარუდგინონ მოთხოვნები იმ რეგულაციების სწრაფად გაუქმებაზე, რომლებიც გერმანულ ბიზნესს მძიმე ტვირთად აწვება.

კონსერვატიული საპარლამენტო ჯგუფის სტრატეგიული დოკუმენტის პროექტი, რომელიც POLITICO-მ მოიპოვა, აჩვენებს გერმანელი კანონმდებლების მზარდ ხისტ ტაქტიკას. „ევროკავშირის დონეზე ბიუროკრატიის მდგრადი შემცირების დღის წესრიგი“ მოიცავს 27 კონკრეტულ მოთხოვნას ევროკომისიის მიმართ. ერთ-ერთი წინადადება ითვალისწინებს სპეციალური საზედამხედველო ორგანოს შექმნას, რომელსაც ექნება ვეტოს უფლება ნებისმიერ ახალ კანონმდებლობაზე, რომელსაც ევროკომისია შესთავაზებს.

დოკუმენტის მიხედვით, აღნიშნული საზედამხედველო ორგანო შეიძლება ჩამოყალიბდეს ახალ სტრუქტურად ან გაფართოვდეს არსებული რეგულაციების კონტროლის საბჭოს უფლებამოსილებები. თუმცა, ასეთი ცვლილებები, სავარაუდოდ, ევროპული ხელშეკრულებების გადახედვას მოითხოვს. გარდა ამისა, კონსერვატორები მოუწოდებენ ევროპულ ინსტიტუტებს, შეზღუდონ საკუთარი აქტივობა და შეამცირონ მომუშავე პერსონალის რაოდენობა.

ეს ზეწოლა ხდება იმ ფონზე, როდესაც კანცლერი მერცი და მისი გუნდი ცდილობენ შეასრულონ დაპირებები გერმანიის ეკონომიკის გაჯანსაღების შესახებ. გასულ კვირას ქვეყნის მთავრობამ 2026 წლის ეკონომიკური ზრდის პროგნოზი გაანახევრა, რისი ერთ-ერთი მიზეზიც ირანში მიმდინარე ომის შედეგებია. შიდა რეფორმების გატარების სირთულეების გამო, მერცმა კრიტიკა ბრიუსელისკენ მიმართა და განაცხადა, რომ საჭიროა „მანქანის მექანიზმში ქანჩის გასაღების ჩაგდება“, რათა ის გაჩერდეს.

თავის მხრივ, ევროკომისია ცდილობს რეგულაციების შემცირებას არსებული კანონების გამარტივების გზით, თუმცა გერმანელი კონსერვატორები ამ ზომებს არასაკმარისად მიიჩნევენ. თავად ფონ დერ ლაიენმა მანამდე აღნიშნა, რომ ბიუროკრატიის პრობლემა ხშირად ეროვნულ დონეზე იქმნება, სადაც ქვეყნები ევროპულ კანონმდებლობას საკუთარ დამატებით ბარიერებს უმატებენ.

სტრატეგიული დოკუმენტის საბოლოო ვერსიაზე კენჭისყრა ბუნდესტაგის კონსერვატიულ ჯგუფში ორშაბათს იგეგმება. მხოლოდ ამის შემდეგ იქცევა აღნიშნული დოკუმენტი პარტიის ოფიციალურ პოლიტიკურ ხაზად. „ამ ნაბიჯით გერმანელი კანონმდებლები აჩვენებენ, რომ რეფორმების ნელი ტემპის გამო მოთმინება ეწურებათ“, - წერს Politico.