Euractiv: ევროპარლამენტარები შიშობენ, რომ ბულგარეთში რადევის გამარჯვებით, უკრაინისთვის იარაღის მიწოდება გართულდება

ევროპარლამენტარები შიშობენ, რომ ბულგარეთში გამართული საპარლამენტო არჩევნების შედეგად ქვეყნის ექს-პრეზიდენტის, რუმენ რადევის პოლიტიკური გუნდის გამარჯვებით, უკრაინისთვის იარაღის მიწოდება გართულდება. ინფორმაციას Euractiv-ი ავრცელებს.

ორგანიზაცია Renew Group-ის პრეზიდენტის, ვალერი ჰაიერის განცხადებით, სოფიაში ხელისუფლების შეცვლა უკრაინისთვის შეიარაღების მიწოდებასთან დაკავშირებით რისკებს შექმნის და ევროპაში მარაგებს შეამცირებს.

რადევი, რომელიც ყოფილი სამხედრო მფრინავია, ხშირად ამბობდა, რომ უკრაინისთვის საბჭოთა კავშირის დროინდელი ბულგარული იარაღის მიყიდვას ეწინააღმდეგება. წინასაარჩევნო კამპანიის დროს ის უკრაინასთან გაფორმებულ 10-წლიან შეთანხმებას, სამხედრო სფეროში თანამშრომლობის შესახებ, მკაცრად აკრიტიკებდა.

როგორც Euractiv-ი წერს, ბულგარეთი უკრაინის თავდაცვაში ცენტრალურ როლს თამაშობდა. 2022 წლიდან ის უკრაინისთვის იარაღის მიწოდების საქმეში ერთ-ერთი საკვანძო ქვეყანაა.