გიორგი ზურაბაშვილი: სავარაუდოდ, ამ თვის ბოლომდე საქართველოში სლოვაკეთი-საქართველოს პირველი ეკონომიკური კომისიის სხდომა შედგება

სავარაუდოდ, ამ თვის ბოლომდე საქართველოში სლოვაკეთი-საქართველოს პირველი ეკონომიკური კომისიის სხდომა შედგება, - განუცხადა საქართველოს საგარეო საქმეთა მინისტრის პირველმა მოადგილემ, გიორგი ზურაბაშვილმა, რომელმაც საქართველოს პრეზიდენტის მიხეილ ყაველაშვილის სლოვაკეთში ვიზიტი შეაჯამა.

მისივე თქმით, პრეზიდენტის ვიზიტი სლოვაკეთში ძალიან წარმატებული და შინაარსიანი იყო.

„მხარეებმა აღნიშნეს ჩვენი ურთიერთობების დადებითი დღის წესრიგი. რა თქმა უნდა, როგორც წესი, უმაღლესი დონის ვიზიტები კიდევ უფრო დაახლოებასა და მეტ დინამიკას ემსახურება და ზუსტად ასეც მოხდა. შევთანხმდით იმაზე, რომ ძალიან მნიშვნელოვანი იქნება და სლოვაკეთის მხარემ დაადასტურა თავისი ინტერესი ეკონომიკური კუთხით, ინვესტიციების მხრივ. სავარაუდოდ, ამ თვის ბოლომდე საქართველოში სლოვაკეთი-საქართველოს პირველი ეკონომიკური კომისიის სხდომა შედგება.

ასევე ითქვა, რომ სლოვაკებისთვის ძალიან საინტერესოა საქართველო, როგორც ტურისტული, გეოგრაფიული ერთეული და აპრილის ბოლომდე საქართველოში ჩამოვა ტურისტული სააგენტოების წარმომადგენლები, რომლებიც ჩვენთან ტურისტულ პოტენციალს გაეცნობიან“, - განაცხადა გიორგი ზურაბაშვილმა.