აჭარის მთავრობის თავმჯდომარე ზურაბ პატარაძე წმინდა მატათა მოციქულის სახელობის გიმნაზიის და წმინდანთა ქართველთა სახელობის სამონასტრო კომპლექსის ინფრასტრუქტურას გაეცნო
აჭარის მთავრობის თავმჯდომარე ზურაბ პატარაძე, საქართველოს განათლების, მეცნიერებისა და ახალგაზრდობის მინისტრთან გივი მიქანაძესთან ერთად, წმინდა მატათა მოციქულის სახელობის გიმნაზიას ესტუმრა და სასწავლო ინფრასტრუქტურას გაეცნო. ინფორმაცია აჭარის მთავრობა ავრცელებს.
ბათუმისა და ლაზეთის მიტროპოლიტმა დიმიტრიმ სტუმრებს გიმნაზიის საქმიანობა, სამომავლო გეგმები და განვითარების ხედვა წარუდგინა.
ზურაბ პატარაძის განცხადებით, გიმნაზიაში შექმნილი თანამედროვე, მოწესრიგებული და ბავშვების საჭიროებებზე მორგებული გარემო ახალგაზრდების სულიერ განვითარებასა და ეროვნული ღირებულებების გაძლიერებას შეუწყობს ხელს. მხარეებმა, ასევე, ისაუბრეს სასწავლო ინფრასტრუქტურის შემდგომი გაფართოებისა და განვითარების შესაძლებლობებზე.
წმინდა მატათა მოციქულის სახელობის გიმნაზია 2022 წლიდან ფუნქციონირებს. ამ ეტაპზე დაწესებულებაში 120-მდე მოსწავლე სწავლობს. გიმნაზიის პანსიონში მოწყობილია საგანმანათლებლო და სახელოვნებო სივრცეები, მოზაიკის სახელოსნო და მოსწავლეთა განვითარებისთვის განკუთვნილი სხვადასხვა ინფრასტრუქტურა. კომპლექსი ასევე აერთიანებს სამონასტრო დანიშნულების სივრცეებს.
მთავრობის თავმჯდომარემ და მინისტრმა წმინდანთა ქართველთა სახელობის სამონასტრო კომპლექსიც დაათვალიერეს.
გიმნაზიაში, ასევე იმყოფებოდნენ აჭარის განათლებისა და სპორტის მინისტრი მაია ხაჯიშვილი და საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონია.
იმედი
წყარო: imedinews.ge