აჭარის უმაღლეს საბჭოში, მინისტრის საათის ფორმატში,სოფლის მეურნეობის მინისტრი წარდგა. კანონმდებლებმა, ასევე მოისმინეს ფინანსთა და ეკონომიკის მინისტრის ანგარიში

აჭარის უმაღლეს საბჭოში გამართულ მორიგ პლენარულ სხდომაზე, რომელსაც თავმჯდომარე ცოტნე ანანიძე უძღვებოდა, კანონმდებლებმა დავით გაბაიძისთვის უმაღლესი საბჭოს წევრის უფლებამოსილების ვადამდე შეწყვეტის საკითხს უყარეს კენჭი. ინფორმაციას აჭარის უმაღლეს საბჭო ავრცელებს.

საკითხი საკონსტიტუციო, იურიდიულ და საპროცედურო საკითხთა კომიტეტის თავმჯდომარემ, მინდია დიასამიძემ წარადგინა. მისი განმარტებით, დავით გაბაიძე სააქციო საზოგადოება „აჭარის წყლის ალიანსის“ სამეთვალყურეო საბჭოს თავმჯდომარედ აირჩიეს, რაც უმაღლესი საბჭოს წევრის მანდატთან შეუთავსებელ თანამდებობად ითვლება. კანონმდებლებმა მას საკანონმდებლო ორგანოში საქმიანობისთვის მადლობა გადაუხადეს და ახალ პოზიციაზე წარმატება უსურვეს.

სხდომაზე მინისტრის საათის ფორმატში აჭარის სოფლის მეურნეობის მინისტრი დენის სალუქვაძე წარდგა. მან სამინისტროს 2025 წლის საქმიანობის ანგარიში და 2026 წლის სამოქმედო გეგმა წარადგინა. მინისტრის ინფორმაციით, 2025 წლის ბიუჯეტი 86%-ით შესრულდა, ხოლო 2026 წლისთვის სამინისტროს ბიუჯეტი 11%-ით გაიზარდა და 40.9 მილიონ ლარს შეადგენს. უწყება 16 პროგრამასა და 13 ქვეპროგრამას ახორციელებს, რომლითაც ბოლო ერთ წელიწადში დაახლოებით 29 ათასმა ფერმერმა ისარგებლა. პროგრამები მიმართულია აგროსექტორის მდგრად განვითარებაზე, ადგილობრივი პროდუქციის პოპულარიზაციასა და სოფლის მოსახლეობის მხარდაჭერაზე. დისკუსიის დასრულების შემდეგ დეპუტატებმა ანგარიში ცნობად მიიღეს.

ამავე სხდომაზე ფინანსთა და ეკონომიკის მინისტრმა ედნარ ნატარიძემ აჭარის 2025 წლის რესპუბლიკური ბიუჯეტის შესრულების ანგარიში წარადგინა. მისი თქმით, გასული წლის ბიუჯეტის შემოსავლების გეგმა 687.7 მილიონი ლარით განისაზღვრა, ხოლო ფაქტობრივმა შესრულებამ 755.4 მილიონი ლარი, ანუ გეგმის 109.8% შეადგინა. შემოსავლების ძირითადი ნაწილი საშემოსავლო გადასახადზე მოდის, რომლის შესრულებამ 110% შეადგინა. მინისტრმა ასევე ისაუბრა რეგიონისთვის მნიშვნელოვან პროექტებსა და მიმართულებებზე და დეპუტატების კითხვებს უპასუხა. სხდომის ბოლოს უმაღლესმა საბჭომ 2025 წლის რესპუბლიკური ბიუჯეტის ანგარიშთან დაკავშირებული დადგენილების პროექტი დაამტკიცა.