ანალიტიკოსი გიორგი ქაჯაია: პრაგმატული და რაციონალური პოლიტიკის შედეგია, რომ ბატონი ტრამპი ცდილობს რაც შეიძლება მჭიდრო, თანასწორუფლებიანი, პარტნიორული ურთიერთობის ახალი ფურცელი დაიწყოს, რისთვისაც ქართული სახელმწიფო მზადაა

ანალიტიკოსმა, გიორგი ქაჯაიამ აშშ-ის პრეზიდენტის მიერ საქართველოს პრემიერ-მინისტრისთვის გამოგზავნილი წერილი „დღის ქრონიკაში“ შეაფასა.

როგორც ანალიტიკოსმა აღნიშნა, პრაგმატული და რაციონალური პოლიტიკის შედეგია, რომ დონალდ ტრამპი ცდილობს, საქართველოსთან რაც შეიძლება, მჭიდრო, თანასწორუფლებიანი, პარტნიორული ურთიერთობის ახალი ფურცელი დაიწყოს.

„დონალდ ტრამპის წერილი გამოწვეულია საქართველოს და ქართული მხარის მიერ თანმიმდევრული, პრაგმატული და დაბალანსებული, ეროვნულ ინტერესებზე დაფუძნებული პოლიტიკის წარმოებით. ჩვენ რომ გვეთამაშა არა ქართული პოლიტიკური თამაში, არამედ ის დაკვეთები შეგვესრულებინა, რაც ბრიუსელის კაბინეტებში იწერებოდა, შესაძლოა ტრამპის ადმინისტრაციის მხრიდან ეს გამოხმაურება დღეს არ ყოფილიყო.

პრაგმატული და რაციონალური პოლიტიკის შედეგია, რომ ბატონი ტრამპი ცდილობს, რაც შეიძლება, მჭიდრო, თანასწორუფლებიანი, პარტნიორული ურთიერთობის ახალი ფურცელი დაიწყოს, რისთვისაც ქართული სახელმწიფო მზადაა და ეს გაცხადებული პოზიციაა.

ბატონი ტრამპი პრაგმატულად უყურებს იმ ფაქტსაც, ჩვენი გეოგრაფიული მდებარეობა რამდენად მნიშვნელოვანია და ყურადღების ცენტრში აქვს სამხრეთ კავკასია, ისიც, თუ რამხელა როლი ენიჭება საქართველოს სავაჭრო ურთიერთობებში“, - აღნიშნა ქაჯაიამ.

ამერიკის შეერთებული შტატების პრეზიდენტმა, დონალდ ტრამპმა საქართველოს პრემიერ-მინისტრს, ირაკლი კობახიძეს ამერიკის დამოუკიდებლობის იუბილეს მილოცვისთვის მადლობის წერილი გაუგზავნა. „სუვერენიტეტის, უსაფრთხოებისა და ხანგრძლივი კეთილდღეობის მხარდასაჭერად ერთობლივი მუშაობით შეგვიძლია მნიშვნელოვანი პროგრესის მიღწევა. მოუთმენლად ველი ჩვენი თანამშრომლობის გაძლიერებას, რათა ერთად ვიაროთ მეტად უსაფრთხო, აყვავებული და მშვიდობიანი მომავლისკენ“, - აღნიშნულია წერილში.