აშშ-ის ენერგეტიკის მდივნის განცხადებით, ირანი ბირთვული იარაღის შექმნასთან „შემაძრწუნებლად ახლოსაა“
აშშ-ის ენერგეტიკის მდივანმა, კრის რაითმა კანონმდებლებს განუცხადა, რომ ირანი ბირთვული იარაღის შექმნასთან „შემაძრწუნებლად ახლოსაა“. მისი თქმით, ქვეყანას მხოლოდ რამდენიმე კვირა აშორებს ერთი ტონა ურანის იარაღისთვის საჭირო დონემდე გამდიდრებამდე.
„შემაძრწუნებლად ახლოს. მათ რამდენიმე კვირა, სულ რამდენიმე კვირა აშორებთ იქამდე, რომ ეს ყველაფერი იარაღისთვის გამოსადეგ ურანამდე გაამდიდრონ“, - განუცხადა რაითმა სენატის შეიარაღებული ძალების კომიტეტს მოსმენაზე. „ამის შემდეგ ჯერ კიდევ რჩება შეიარაღების პროცესი, თუმცა ისინი ბირთვული იარაღის შექმნასთან საკმაოდ ახლოს არიან“.
ურანის გარკვეულ ზღვარზე ზემოთ, დაახლოებით 90%-მდე, გამდიდრება ნიშნავს, რომ მისი გამოყენება ბირთვული იარაღის დასამზადებლად არის შესაძლებელი.
დემოკრატი სენატორის, რიჩარდ ბლუმენტალის კითხვაზე ირანის მფლობელობაში არსებული სხვა, გავრცელებული ინფორმაციით 11 ტონა ურანის სტატუსის შესახებ, რაითმა აღნიშნა, რომ გამდიდრების დონე 60%-მდე მერყეობს, თუმცა ირანს აქვს „დიდი რაოდენობით“ 20%-მდე გამდიდრებული ურანი, რაც მან „ძალიან შემაშფოთებლად“ შეაფასა.
ბლუმენტალმა რაითს დაუსვა დაზუსტებითი კითხვა იმის შესახებ, მოუწევდა თუ არა პრეზიდენტ დონალდ ტრამპს ირანის ურანის მთელი მარაგების განადგურება გამდიდრების პროცესის შესაჩერებლად.
„ვფიქრობ, ეს გონივრული სტრატეგიაა“, - თქვა რაითმა. „საბოლოო ჯამში, მიზანი ურანის მომავალი გამდიდრების პრევენციაცაა. დიახ, უსაფრთხო მსოფლიოსთვის ჩვენ მათი ბირთვული პროგრამა უნდა დავასრულოთ“.
