აშშ-ის მთავრობა: გზების ბლოკირება საფრთხეს უქმნის დემოკრატიასა და კანონის უზენაესობას

აშშ-ის, არგენტინის, ბოლივიის, კანადის, ჩილეს, კოსტა-რიკის, დომინიკის რესპუბლიკის, ეკვადორის, სალვადორის, გვატემალის, გაიანის, ჰონდურასის, იამაიკის, პანამის, პარაგვაისა და პერუს მთავრობებმა ერთობლივი განცხადება გაავრცელეს, რომელშიც ბოლივიაში მიმდინარე მოვლენებთან დაკავშირებით ღრმა შეშფოთება გამოთქვეს.

კერძოდ, განცხადებაში აღნიშნულია, რომ გზების ძალადობრივი ბლოკირება საფრთხეს უქმნის დემოკრატიასა და კანონის უზენაესობას, ხოლო პრეზიდენტ როდრიგო პასის ლეგიტიმური და დემოკრატიულად არჩეული მთავრობის დასუსტებისა და დამხობის მცდელობები სერიოზულ საფრთხეს წარმოადგენს, როგორც ბოლივიაში კონსტიტუციური წესრიგისთვის, ისე მთლიანად ნახევარსფეროს დემოკრატიული სტაბილურობისთვის.

„მოძალადე უმცირესობა ცდილობს უგულებელყოს ჩატარებულ არჩევნებში გამოხატული ბოლივიელი ხალხის ნება, უარს ამბობს ხელისუფლების მიერ შეთავაზებულ დიალოგზე და შვიდ კვირაზე მეტია გზების ბლოკირებას აგრძელებს, რის შედეგადაც მოსახლეობას ეზღუდება საკვებზე, ჯანდაცვაზე, საწვავსა და სხვა აუცილებელ რესურსებზე წვდომა“, - აღნიშნულია განცხადებაში.

როგორც აღნიშნული ქვეყნების ერთობლივ განცხადებაშია ნათქვამი, ამ ქმედებებმა მილიონობით მოქალაქის ყოველდღიურ ცხოვრებაზე მძიმე გავლენა მოახდინა და საფრთხის ქვეშ დააყენა ფუნდამენტური უფლებები.

„გზებზე გადაადგილების შეზღუდვის გამო დაფიქსირდა სამოქალაქო პირების დაღუპვის შემთხვევებიც, რადგან მოქალაქეები დროულად ვერ იღებდნენ მედიკამენტებს და ვერ აღწევდნენ საავადმყოფოებსა და სამედიცინო დაწესებულებამდე. ცალკე აღსანიშნავია, რომ დემონსტრანტების მხრიდან დაშავდნენ პოლიციის თანამშრომლებიც, რომლებიც სამსახურებრივ მოვალეობას ასრულებდნენ. ძალადობა ვერ გახდება კონსტიტუციური წესრიგის შეცვლის საშუალება“, - აღნიშნულია დოკუმენტში.