აშშ-ის წარმომადგენელთა პალატამ დაამტკიცა კანონპროექტი, რომელიც უკრაინისთვის დახმარებას, ხოლო რუსეთისთვის სანქციების დაწესებას ითვალისწინებს

აშშ-ის კონგრესის წარმომადგენელთა პალატამ ხმათა უმრავლესობით დაამტკიცა კანონპროექტი, რომელიც რუსეთის წინააღმდეგ სანქციების შემოღებას, ხოლო უკრაინისთვის ფინანსური დახმარების გამოყოფას გულისხმობს. ინფორმაციას CNN-ი ავრცელებს.

კანონპროექტს 226-მა კონგრესმენმა დაუჭირა მხარი, ხოლო 195 წინააღმდეგი იყო. როგორც CNN-ი წერს, პაკეტს 18-მა „რესპუბლიკელმა“ და ერთმა დამოუკიდებელმა კონგრესმენმა დაუჭირა მხარი, რაც ფაქტობრივად ნიშნავს, რომ ისინი აშშ-ის პრეზიდენტის დონალდ ტრამპის პოზიციას რუსეთ-უკრაინის ომთან დაკავშირებით არ იზიარებენ.

კანონპროექტი გულისხმობს სანქციების შემოღებას რუსეთის ლიდერებისა და ინსტიტუტების წინააღმდეგ, წამყვანი ბანკების, სანავთობო და სამთო-მომპოვებელი კომპანიების ჩათვლით. გარდა ამისა, ახალი ინიციატივა აშშ-ში იმპორტირებულ ყველა რუსულ პროდუქციაზე 500-პროცენტიანი ტარიფების დაწესებას და რუსული ნედლი ნავთობის იმპორტზე აკრძალვის დაწესებას გულისხმობს.

ახალი ინიციატივა უკრაინისთვის სამხედრო დახმარების გაწევას, მათ შორის იარაღის შესაძენად 8 მილიარდი დოლარის გამოყოფას, ლენდ-ლიზის პროგრამის გაგრძელებას ითვალისწინებს.