უკრაინამ Wildberries-ის 2 მსხვილ ლოგისტიკურ ცენტრზე იერიში მიიტანა

უკრაინულმა უპილოტო საფრენმა აპარატებმა რუსეთის პენზის ოლქსა და უდმურტეთის რესპუბლიკაში მდებარე ონლაინრითეილერ Wildberries-ის მსხვილ ლოგისტიკურ საწყობებზე იერიში მიიტანეს. როგორც ირკვევა, თავდასხმის შედეგად გაჩენილი მასშტაბური ხანძრის გამო კომპანიას ტვირთების გადამისამართება და თანამშრომლების ევაკუაცია მოუწია. რუსულ მხარეს იერიშის შედეგად მიყენებული ზარალის ლიკვიდაციისთვის საგანგებო სამსახურების მობილიზება დასჭირდა. მომხდარ ფაქტებთან დაკავშირებით რუსეთის საგამოძიებო კომიტეტმა ტერორიზმის მუხლით გამოძიება უკვე დაიწყო.

არსებული ინფორმაციით, პენზის ოლქში მდებარე ლოგისტიკური ცენტრიდან ხელისუფლებამ 200 თანამშრომლის ევაკუაცია განახორციელა. გუბერნატორ ოლეგ მელნიჩენკოს ცნობით, ინციდენტის შედეგად კომპანიის 1 თანამშრომელი დაშავდა. თავდასხმა უდმურტეთის რესპუბლიკაში მდებარე ქალაქ სარაპულშიც დაფიქსირდა, სადაც ხანძრის გაჩენის მიუხედავად, დაშავებულების შესახებ ინფორმაცია არ გავრცელებულა. უდმურტეთის ხელმძღვანელმა ოლგა აბრამოვამ დაადასტურა, რომ ადგილზე სამაშველო ჯგუფები მუშაობენ.

მნიშვნელოვანია ითქვას, რომ ბოლო ორი კვირის განმავლობაში უკრაინულმა დრონებმა Wildberries-ის ათამდე საწყობი დააზიანეს. ექსპერტთა შეფასებით, იერიშებმა კომპანიის სასაწყობო სიმძლავრეების 10-15% გაანადგურა და ათიათასობით მცირე ბიზნესს მნიშვნელოვანი ფინანსური ზიანი მიაყენა. ოფიციალური კიევი Wildberries-ს რუსული არმიისთვის დრონების ნაწილებისა და სხვა აღჭურვილობის მიწოდებაში ადანაშაულებს, რასაც კომპანიის ხელმძღვანელობა კატეგორიულად უარყოფს. შექმნილი ვითარების ფონზე, ონლაინრითეილერი სახელმწიფო მხარდაჭერის მიღებას მოელის და ახალ სასაწყობო ფართობებს ყაზახეთში აქტიურად ეძებს.

ცნობისთვის, Wildberries-ი რუსეთში მოქმედი უმსხვილესი ონლაინრითეილერია. უკრაინული მხარის ცნობით, კომპანიის სასაწყობო ობიექტები რუსული არმიის მომარაგების ჯაჭვში აქტიურად მონაწილეობს, რის გამოც ის სამხედრო სამიზნედ მიიჩნევა.