აშშ-მა ირანის რევოლუციის გუშაგთა კორპუსთან დაკავშირებული ხუთი ტანკერი გაანადგურა

აშშ-ის შეიარაღებული ძალების ცენტრალური სარდლობის (CENTCOM) ინფორმაციით, ამერიკელმა სამხედროებმა ირანის ნედლი ნავთობის ხუთი გადამზიდავი გაანადგურეს მას შემდეგ, რაც ირანის ისლამური რევოლუციის გუშაგთა კორპუსმა ბოლო ორი დღის განმავლობაში ორჯერ ბალისტიკური რაკეტებით აშშ-ის სამხედრო-საზღვაო ძალების ხომალდს შეუტია.

აშშ-ის სამხედრო ხომალდმა ირანის თავდასხმების მცდელობები წარმატებით აიცილა თავიდან და რეგიონულ წყლებში პატრულირება განაგრძო. ინციდენტის შედეგად ამერიკელი სამხედრო მოსამსახურეები არ დაშავებულან, აღნიშნულია განცხადებაში.

ირანის მიერ განხორციელებულ ბოლო წარუმატებელ თავდასხმებზე საპასუხოდ, CENTCOM-მა ომანის ყურეში ისლამური რევოლუციის გუშაგთა კორპუსის კუთვნილი ნედლი ნავთობის გადამზიდავი ოთხი ტანკერი - M/T Kaviz, M/T Charminar, M/T Horizon 1 და M/T Riesco გაანადგურა. კიდევ ერთი ტანკერი, M/T Derya, ხარკის კუნძულთან ახლოს განადგურდა.

ამერიკელმა სამხედროებმა გემების ეკიპაჟებს ხომალდების დატოვება უბრძანეს, რის შემდეგაც გემებზე იერიში მიიტანეს და ისინი მწყობრიდან გამოიყვანეს.

CENTCOM-ის განცხადებით, ირანი ამ ტანკერებს იყენებდა მრავალმილიარდიანი ფარული ქსელებისთვის, რომლის საშუალებითაც ფინანსდებოდა გუშაგთა კორპუსი და მისი რეგიონული მოკავშირე შეიარაღებული დაჯგუფებები. სარდლობის განცხადებით, ირანს ამ გემების დასაცავად შესაბამისი შესაძლებლობები არ გააჩნია.