AXIOS: ტრამპი ირანის წინააღმდეგ სამხედრო მოქმედებების განახლებას განიხილავს

აშშ-ის სამი ოფიციალური პირის განცხადებით, პრეზიდენტი ტრამპი ორშაბათს ეროვნული უსაფრთხოების გუნდს ხვდება, რათა ირანის ომში შემდგომი ნაბიჯები განიხილოს, მათ შორის სამხედრო მოქმედებების შესაძლო განახლება მას შემდეგ, რაც კვირას ქვეყნებს შორის მოლაპარაკებები ჩიხში შევიდა, - წერს გამოცემა AXIOS-ი.

აშშ-ის ოფიციალური პირების განცხადებით, ტრამპს ომის დასასრულებლად შეთანხმების მიღწევა სურს, თუმცა ირანის მხრიდან მისი მოთხოვნების უმეტესობის უარყოფა და ბირთვულ პროგრამასთან დაკავშირებით არსებით დათმობებზე უარის თქმა, სამხედრო ვარიანტს კვლავ დღის წესრიგში აბრუნებს.

ბოლო დღეების განმავლობაში, ტრამპმა საჯაროდ რამდენჯერმე დაიმუქრა, რომ დიპლომატიის მარცხის შემთხვევაში, ირანის ინფრასტრუქტურას დაბომბავდა.

აშშ ათი დღის განმავლობაში ელოდა ირანის პასუხს ომის დასრულების შესახებ მომზადებულ წინადადებაზე. თეთრი სახლი ოპტიმისტურად იყო განწყობილი და იმედოვნებდა, რომ ირანის პოზიციები შეთანხმებისკენ გადადგმულ პროგრესს აჩვენებდა.

თუმცა, ირანის პასუხი, რომელიც კვირას იყო მიღებული, პოზიტიური არ აღმოჩნდა. ირანის სახელმწიფო ტელევიზიამ გაავრცელა ინფორმაცია, რომ თეირანმა უარყო აშშ-ის წინადადება, რადგან მათი თქმით, ეს „ტრამპის გადაჭარბებული მოთხოვნების წინაშე ირანის კაპიტულაციას ნიშნავდა“.

ტრამპმა ირანის პასუხი კვირასვე უარყო. „ეს არ მომწონს. ეს შეუსაბამოა“, - განუცხადა მან AXIOS-ს.