ბაია კვიციანი: განათლების სამინისტრო 26 მაისს წარმოდგენილი იქნება ოზურგეთში - მონაწილეობას მიიღებენ როგორც უნივერსიტეტები, ასევე პროფესიული კოლეჯები სხვადასხვა შემეცნებითი ღონისძიებით, ასევე მასტერკლასებით, „ვორქშოფებით“, გამოფენებით

განათლების, მეცნიერების და ახალგაზრდობის მინისტრის მოადგილემ ბაია კვიციანმა იმ ღონისძიებების შესახებ ისაუბრა, რომლებსაც სამინისტრო საქართველოს დამოუკიდებლობის დღის აღსანიშნავად, 26 მაისს ოზურგეთში გეგმავს.

„26 მაისის მთავარი სლოგანი გახლავთ „ რწმენა გვაძლიერებს და სიყვარული გვაერთიანებს“, . წელს განსაკუთრებულად აღინიშნება დამოუკიდებლობის დღე, ვინაიდან ის ეძღვნება ჩვენი ქვეყნის გაქრისტიანების 1700 წლისთავს.

განათლების სამინისტრო წელს წარმოდგენილი იქნება ოზურგეთში, საკმაოდ მასშტაბურად. მონაწილეობას მიიღებენ როგორც უნივერსიტეტები, ასევე პროფესიული კოლეჯები სხვადასხვა შემეცნებითი ღონისძიებით, ასევე მასტერკლასებით, „ვორქშოფებით“, გამოფენებით. დაგეგმილი იქნება სხვადასხვა ღონისძიება ბავშვებისთვის. ძალიან სახალისო დღეს ვუმზადებთ ჩვენს სტუმრებს. ეს ყველაფერი გალაკონცერტით დაგვირგვინდება“, - განაცხადა ბაია კვიციანმა.

საქართველოს დამოუკიდებლობის დღის აღსანიშნავი ღონისძიებისთვის მზადება აქტიურად მიმდინარეობს. ყველა სამინისტრო, ყველა დიდ ქალაქში საკუთარ სტენდს და თემატურ სივრცეს დაახვედრებს სტუმრებს. პროგრამა ყველა უწყებას საკმაოდ მრავალფეროვანი აქვს. ფიცის დადების ცერემონიის კონცეფცია კი დაეფუძნება ქრისტიანობის სახელმწიფო რელიგიად გამოცხადების 1700 წლისთავს. ფიცს წვევამდელები 12 ისტორიულ ადგილზე დადებენ.