Bloomberg: ბრიუსელმა სერბეთი გააფრთხილა, რომ ჩინური ინვესტიციების ზრდა ევროკავშირში გაწევრიანების შანსებს შეამცირებს

სააგენტო Bloomberg-ის ინფორმაციით, სერბეთის პრეზიდენტი ალექსანდარ ვუჩიჩი ჩინეთთან სიახლოვის გამო ევროკავშირთან ურთიერთობებში „წითელ ხაზს“ უახლოვდება.

როგორც სააგენტო იუწყება, სერბეთი მოწინავე ჩინური შეიარაღების ერთადერთი მყიდველია ევროპაში. მიმდინარე წელს მან საკუთარი არსენალის მოდერნიზება შეძლო, ჩინური წარმოების ზებგერითი რაკეტების ჩათვლით. მომდევნო ნაბიჯი, შესაძლოა, გამანადგურებლების შესყიდვა გახდეს, რაც მომდევნო კვირას ვუჩიჩის ჩინეთში ვიზიტის დროს განხილვის საგანი იქნება.

Bloomberg-ის ცნობით, ევროკავშირის საზღვართან პეკინის პლაცდარმის არსებობამ ორგანიზაციაში ბელგრადის გაწევრიანების პერსპექტივაში ეჭვი შეიტანა. ამ გარემოებას ისიც ემატება, რომ ვუჩიჩი დასავლეთთან, ჩინეთთან და რუსეთთან დაბალანსებულ პოლიტიკას ატარებს.

იარაღის შესყიდვა აჩვენებს, რომ სერბეთი საინვესტიციო ცენტრიდან ჩინეთის „ურყევ მეგობრად“ გადაიქცა, რომელიც ტაივანზე პეკინის პრეტენზიებს მხარს უჭერს, ხოლო ჩინეთი ამას სერბეთის ტერიტორიული მთლიანობის მხარდაჭერით პასუხობს.

„ევროკავშირს არ აქვს კანონიერი საფუძველი თქვას: „თქვენ ამის ყიდვა არ შეგიძლიათ“, მაგრამ აღნიშნული გარემოება სერბეთის ერთგულებას უსაფრთხოების ინტეგრირებული ინფრასტურქტურის მიმართ კითხვის ნიშნის ქვეშ აყენებს“, - ციტირებს სააგენტო ავსტრიელ პროფესორს ფლორიან ბიბერს.

ერთ-ერთი ევროპელი ჩინოვნიკის განცხადებით, ევროკავშირმა სერბეთის ხელისუფლება გააფრთხილა, რომ ჩინური ინვესტიციების ზრდა ევროკავშირში ქვეყნის გაწევრიანების შანსებს დააზიანებს.