Bloomberg: ევროკავშირი უკრაინას 90 მილიარდი ევროს ოდენობის კრედიტის ნაწილს გარკვეული რეფორმების გატარების შემდეგ გამოუყოფს

ევროკავშირი უკრაინისთვის 90 მილიარდი ევროს ოდენობის სესხის ნაწილის გამოყოფას კიევის მიერ არაპოპულარული საგადასახადო რეფორმების გატარებას დაუკავშირებს. ინფორმაციას Bloomberg-ი ავრცელებს.

სააგენტოს ცნობით, საგადასახადო რეფორმის გატარებას უკრაინისგან საერთაშორისო სავალუტო ფონდი დიდი ხანია მოითხოვს.

საუბარია 8,4 მილიარდი ევროს გამოყოფაზე, რომელიც უკრაინის მაკროეკონომიკური პარამეტრების გაუმჯობესებას უნდა მოხმარდეს. როგორც Bloomberg-ი იუწყება, ევროკავშირის წევრმა ქვეყნებმა ორშაბათს უკრაინის მაკროფინანსური დახმარების პირობები უკვე შეათანხმეს.

დახმარების მისაღებად კიევმა უნდა მიიღოს კანონი, რომელიც 150 ევრომდე ღირებულების საერთაშორისო ამანათებს 20-პროცენტიანი დამატებითი ღირებულების გადასახადით დაბეგრავს. წყაროების ცნობით, უკრაინამ პირველი ტრანში, შესაძლოა, მიიღოს უკვე ივნისში, მეორე - სექტემბერში, ხოლო მესამე - წლის ბოლოს, თუ საჭირო რეფორმებს გაატარებს.

როგორც წყაროებმა Bloomberg-ს განუცხადეს, ევროკავშირის აღნიშნული მოთხოვნა პრაქტიკულად იმეორებს საერთაშორისო სავალუტო ფონდის პირობებს 700 მილიონი ტრანშის გამოყოფის შესახებ. ევროკომისია უკრაინისთვის ფინანსური დახმარების პროცესის კოორდინაციას საერთაშორისო სავალუტო ფონდთან ახორციელებს.

თუმცა, როგორც სააგენტო წერს, საგადასახადო ცვლილებები უკრაინელების უკმაყოფილებას იწვევს, რაც ეჭვქვეშ აყენებს მათ მიღებას ქვეყნის უმაღლეს რადაში. უკრაინელმა დეპუტატმა, იაროსლავ ჟელეზნიაკმა Bloomberg-ს განუცხადა, რომ კანონპროექტის მხარდასაჭერად საჭირო ხმები ჯერ არ არსებობს.

უკრაინის ფინანსთა სამინისტროში განაცხადეს, რომ მთავრობა ევროკავშირთან შეთანხმების დასრულებაზე მუშაობს, ხოლო შემდეგ პარლამენტში მის რატიფიცირებას მოახდენს.