Bloomberg: პეტერ მადიარს ევროკავშირში უკრაინის გაწევრიანების შესახებ მოლაპარაკებების დაწყებაზე თანხმობის მიცემამდე სურს, რომ უკრაინაში მცხოვრებ უნგრელებს დამატებითი უფლებები მიეცეთ
უნგრეთის მომავალ ლიდერს, პეტერ მადიარს ევროკავშირში უკრაინის გაწევრიანების შესახებ მოლაპარაკებების დაწყებაზე თანხმობის მიცემამდე სურს, რომ უკრაინაში მცხოვრებ უნგრელებს დამატებითი უფლებები მიეცეთ. ინფორმაციას Bloomberg-ი რამდენიმე წყაროზე დაყრდნობით ავრცელებს.
სააგენტოს ცნობით, აღნიშნული საკითხი მადიარისა და ევროპული საბჭოს პრეზიდენტის, ანტონიუ კოშტას შეხვედრაზე ბრიუსელში განიხილებოდა. ევროკავშირი მადიარზე ზეწოლას ახდენს, რათა მან ვიქტორ ორბანის წარმავალი მთავრობის პოლიტიკა შეცვალოს და უკრაინის გაწევრიანების შესახებ მოლაპარაკებების დაწყებას ხელი არ შეუშალოს.
Bloomberg-ის ინფორმაციით, მადიარმა ევროკავშირს 11 პუნქტისგან შემდგარი მოთხოვნების სია წარუდგინა, რომელიც ორბანის მიერ იყო დაწერილი და 2024 წელს კიევისთვის გადაცემული. ბუდაპეშტი კიევისგან ითხოვს, რომ უკრაინაში მცხოვრებ უნგრელებს უნგრულ ენაზე განათლების მიღების საშუალება ჰქონდეთ.
მიუხედავად იმისა, რომ მადიარმა კოშტასთან გამართულ შეხვედრას „სასარგებლო და კონსტრუქციული“ უწოდა, ის ნაკლებად პოზიტიური იყო, ვიდრე ევროკომისიის პრეზიდენტთან, ურსულა ფონ დერ ლაიენთან გამართული მოლაპარაკებები, წერს სააგენტო.
კოშტასთან მოლაპარაკებების დროს მადიარმა უკრაინაში მცხოვრები უნგრელების უფლებების საკითხი წამოჭრა.
„მადიარის მკაცრმა პოზიციამ, შესაძლოა, კიევისა და ბრიუსელის ჩინოვნიკების იმედგაცრუება გამოიწვიოს, რომლებსაც იმედი ჰქონდათ, რომ ორბანის წასვლით უკრაინის განაცხადი გაწევრიანების შესახებ ახალ იმპულსს შეიძენდა, განსაკუთრებით რიგ პოლიტიკურ საკითხებზე ფორმალური მოლაპარაკებების დაწყების ნაწილში, რომლის კრიტერიუმები ქვეყანამ უკვე დააკმაყოფილა“, - წერს Bloomberg-ი.
