Bloomberg: საფრანგეთში ბოლო ხუთ წელიწადში უმუშევრობის ყველაზე მაღალი მაჩვენებელი დაფიქსირდა

საფრანგეთში ყველა ასაკობრივ ჯგუფში უმუშევრობის დონე გაიზარდა და ბოლო ხუთ წელიწადში ყველაზე მაღალ ნიშნულს მიაღწია. ინფორმაციას Bloomberg-ი ქვეყნის სტატისტიკურ სამსახურზე დაყრდნობით ავრცელებს.

საფრანგეთის სტატისტიკის ეროვნული სააგენტოს მონაცემებით, ქვეყანაში უმუშევრობის დონის მაჩვენებელი 8,1%-ს შეადგენს.

თავდაპირველად ეკონომისტები პროგნოზირებდნენ, რომ აღნიშნული მაჩვენებელი 7,8%-მდე შემცირდებოდა.

აპრილში გამოქვეყნებული მონაცემების თანახმად, საფრანგეთის ეკონომიკა პირველ კვარტალში არ გაზრდილა, ხოლო საფრანგეთის ცენტრალური ბანკის მიერ ჩატარებულმა გამოკითხვამ აჩვენა, რომ ირანის ომმა ეკონომიკური აქტივობა შეაჩერა და ინფლაციური წნეხი გაზარდა.

შრომის ბაზარზე ვითარება უარესდება იმის მიუხედავად, რომ მთავრობამ თებერვალში საბიუჯეტო კრიზისი გადალახა და პოლიტიკურ კოლაფსს თავი აარიდა, წერს სააგენტო.