Bloomberg: ტრამპის მიერ გამოთქმული მოსაზრება იმის შესახებ, რომ ის უკრაინას Patriot-ის ტიპის რაკეტსაწინააღმდეგო სისტემების წარმოების უფლებას მისცემს, არც ადვილი შესასრულებელი იქნება და არც სწრაფად მოხდება
აშშ-ის პრეზიდენტის, დონალდ ტრამპის მიერ ოთხშაბათს გამოთქმული მოსაზრება იმის შესახებ, რომ ის უკრაინას Patriot-ის ტიპის რაკეტსაწინააღმდეგო სისტემების წარმოების უფლებას მისცემდა, არც ადვილი შესასრულებელი იქნება და არც სწრაფად მოხდება, - წერს სააგენტო Bloomberg-ი.
ომისგან დაზარალებულ უკრაინაში Lockheed Martin-ის Patriot-ის ტიპის რაკეტების წარმოება, მით უმეტეს მასშტაბურად, უზარმაზარი გამოწვევა იქნება.
PAC-3-ის მოდიფიკაცია, რომელსაც ბალისტიკური რაკეტების ჩამოგდება შეუძლია და თითოეული მათგანის ღირებულება დაახლოებით 5 მილიონი დოლარია, მსოფლიოში ერთ-ერთ ყველაზე მოწინავე საჰაერო თავდაცვის იარაღად ითვლება და ამჟამად მხოლოდ ორ ქვეყანაში - აშშ-სა და იაპონიაში - იწარმოება.
„Patriot-ის რაკეტის დამზადებას წლები სჭირდება, რაც იმას ნიშნავს, რომ უკრაინაში ამ ტიპის შეიარაღების წარმოება ვერ მოხერხდება იმ მჭიდრო ვადებში, რომელიც მათ სასიცოცხლოდ ესაჭიროებათ“, - განაცხადა Bloomberg Economics-ის ანალიტიკოსმა, ბეკა ვასერმა. - „გარდა ამისა, უკრაინის გამოცდილება დრონებისა და რაკეტების სწრაფი წარმოების კუთხით, შესაძლოა, ვერ გავრცელდეს Patriot-ის წარმოებაზე, რისი მიზეზიც აშშ-ის მხრიდან ტექნოლოგიურ კონტროლთან დაკავშირებული მკაცრი შეზღუდვებია“.
ამჟამინდელი წარმოების მიწოდების ჯაჭვები უკვე გადატვირთულია, ხოლო ახალი საწარმოო ხაზის გახსნა სპეციალიზებულ აღჭურვილობასა და შესაბამის მომზადებას მოითხოვს - ორივე მათგანი პროექტის ვადებს მნიშვნელოვნად გაზრდის.
ბოლო დღეების განმავლობაში უკრაინამ განაცხადა, რომ მათმა ძალებმა რუსული ბალისტიკური რაკეტების ჩამოგდება ვერ შეძლეს, მაშინ როცა მოსკოვი დიდი ქალაქების მიმართულებით იერიშებს ახორციელებდა. ამან კიდევ უფრო გაუსვა ხაზი Patriot-ის სისტემების კრიტიკულ საჭიროებას, რომელზეც კიევი, როგორც წესი, მსგავსი საფრთხეების მოსაგერიებლად იყო დამოკიდებული. ნატოს მოკავშირეებმა კიევი გააფრთხილეს, რომ მათი არსენალი შეზღუდულია.
