ბოჭორიშვილი: ევროპის საბჭოს მინისტერიალის ფორმატში შეხვედრა საუკეთესო შესაძლებლობაა, ვისაუბროთ საკითხებზე, რაც აწუხებს საქართველოს - დემოკრატიაზე საუბრისას შეუძლებელია თვალი დავხუჭოთ ორმაგ სტანდარტებზე
ევროპის საბჭოს მინისტერიალის ფორმატში შეხვედრა საქართველოსთვის არის საუკეთესო შესაძლებლობა, მონაწილე ქვეყნებთან ერთად ვისაუბროთ საკითხებზე, რომელიც აწუხებს საქართველოს, რაც მნიშვნელოვანია საქართველოს საგარეო პოლიტიკურ დღის წესრიგში, - განაცხადა საქართველოს საგარეო საქმეთა მინისტრმა, მაკა ბოჭორიშვილმა მოლდოვაში მედიასთან.
მისივე თქმით, შეუძლებელია მმართველი გუნდი არ გამოეხმაუროს იმ დამოკიდებულებას, რომელიც არსებობს ორგანიზაციის წევრი ქვეყნების მხრიდან საქართველოს მიმართ.
„პირველ რიგში, საქართველოს უსაფრთხოების გამოწვევები, რომლებიც ჩვენი ქვეყნის წინაშე დგას, ძალიან მნიშვნელოვანია, რათა ჩვენი კოლეგა მინისტრები შესაბამისად იყვნენ ინფორმირებული იმ მოვლენების შესახებ, რომლებიც საქართველოსთან მიმართებით ვითარდება, მათ შორის საქართველოს ოკუპირებულ რეგიონებში მიმდინარე პროცესების თაობაზე. ასევე, რა თქმა უნდა, შეუძლებელია, არ გამოვეხმაუროთ იმ დამოკიდებულებას, რომელიც არსებობს ორგანიზაციის წევრი ქვეყნების მხრიდან საქართველოს მიმართ. როდესაც ვსაუბრობთ დემოკრატიაზე, შეუძლებელია, თვალი დავხუჭოთ ორმაგ სტანდარტებზე, რომლებიც საქართველოსთან მიმართებით გამოიყენება.
შემაშფოთებელი იყო ნამდვილად იმ ფაქტის ნახვა, რომ საქართველოს სამ ტელევიზიას უარი ეთქვა აკრედიტაციაზე, ვერ შეძლეს პროფესიული საქმიანობის განხორციელება და მინისტერიალის გაშუქება. ეს ნამდვილად საყურადღებო ფაქტია და იმსახურებს, რომ ორგანიზაციის წევრებმა იცოდნენ ამის შესახებ – რამდენად შეიძლება, ადგილი ჰქონდეს ორმაგ სტანდარტებს მაშინ, როდესაც საუბრობენ მედიისა და სიტყვის თავისუფლებაზე. შესაბამისად, ეს ფაქტი უყურადღებოდ ვერ დარჩებოდა ჩემი გამოსვლისას.
ასევე, როდესაც საუბარია ხალხის მხარდაჭერაზე, მნიშვნელოვანია აღინიშნოს, რომ ხალხის მიერ არჩეული ხელისუფლება, პირველ რიგში, წარმოადგენს ნებისმიერი საზოგადოების, ნებისმიერი ქვეყნის ლეგიტიმურ ინტერესებს. შეუძლებელია, ამაზეც არ გავამახვილოთ ყურადღება იმ დამოკიდებულების ფონზე, რომელიც ევროსაბჭოს ზოგიერთ წევრ ქვეყანას აქვს საქართველოს ხელისუფლების მიმართ.
